Diyarname

Di Newroza Stenbolê de mîlyon kes amade bû. Vane notên ji Newroza Stenbolê:

- Ji serê sibê de, ji hemû navçeyên Stenbolê gel bi erebeyan berê xwe da Kazliçeşmeya Zeytinburnuyê ku her sal Newroz li wir tê pîrozkirin.

- Ji navenda Topkapi heta qadê ji mirovan rê li erebeyan hat girtin. Gel ji wir heta qadê meşiya.

- Ji salên borî cudatir yên dihatin qadê, ji tijebûna qadê şaşwaz dibûn. Ji bilî qadê ku êdî cih lê tune bû, li dora qadê aliyê behrê jî, aliyên din jî mirov tije bûn. Ev nêzî deh salan e li Stenbolê, li Kazliçeşmeyê Newroz tê pîrozkirin, lê heta niha Newroza Stenbolê ew qas mirov li ser hev nedîtibûn. Bi gotineke din Stenbolê rekora xwe şikand; bi ew qas girseyê silav li Amedê jî kir.

- Ji her sal zêdetir û cudatir gelek alên PKK'ê, BDP, HDP û posterên Ocalan hebûn. Ji alan êdî mirov nedixiyan. Demirtaş ku hat ser dikê got: "Ez dawiya qadê, ez we nabînim. Ka alên xwe daxin, dest bilind bikin, ez we bibînim." Her kesî al daxistin û bi tiliyên serketinê dest bilind kirin. Û dûre helbet çepikan coş bilind kir.

- Li platformê wêneyê Ocalan, Mazlum Dogan, Mahir Çayan, Deniz Gezmiş, İbrahim Kaypakkaya, Kemal Pir û Rahşan Demirel hatibû daqilandin. Her wiha pankarta li ser gotina HPG "Yan muzakere, yan şer" nivîsandibû daliqandibûn.

- Bi têra xwe alên YPG'ê hebûn û her ku peyva Rojava derbas dibû, coş jî pêre bilind dibû. Her cure al hebûn.

- Jinên kurd wekî her gavê bi kincên xwe yên gelêrî reng dan qadê.

- Firoşkaran li dora qadê ji benên kesk û sor û zer bigire, heta tîşortên li ser Kurdistan nivîsandî, gelek tişt difrotin. Banga firotinê jî balkêş bû. Yek ji wan ku av difirot wisa bang dikir: "Werin avê, ava Kurdistanê, ava Batmanê, Entabê..."

- Rêxistina Bagcilara Stenbolê ya BDP'ê standên xwarinê (kofte, doner, çay û hwd.) vekiribû. Ev yek tiştek baş bû. Ji bo aboriya rêxistinê jî. 

- Ji Hevserokê BDP'ê yên Stenbolê Arife Çinar bi kurdî dest bi axaftina xwe kir û bi tirkî dom kir, Hevserokê din Emrullah Bingol tenê bi kurdî û bi coş axaftin kir.

- Piraniya gel telefonên wan di dest de û foto dikişandin.

- Yekî porê xwe wekî kumika dîkan bilind kiribû, rûyê xwe bi rengên kesk û sor û zer boye kiribû û tîşortek Ocalan li xwe kiribû li qadê bû. Gelek kes diçû pêre wêne dikişand. 

- Nameya Ocalan ku di Newroza Amedê de hatibû xwendin, li Stenbolê jî bi kurdî û tirkî hat xwendin.

- Li gelek cihên qadê stand hatibûn vekirin û ji bo azadiya Ocalan îmze dihatin berhevkirin.

- Berendama Hevserokatiya Şaredariya Bajarê Mezin a Stenbolê Pinar Aydinlar kincên gelêrî yên kurdan li xwe kiribûn û wisa axivî. Berendamên din Sirri Sureyya Onder bi çepikên mezin derket ser dikê, li gel mêze kir, girseya Stenbolê û Amedê da ber hev got; "Ma hûn mecbûr bûn Amedê mehcûb bikin. Ev çi qelebalix e, ev çi coş e."

- Ew qas coş zêde bûn, gel ew pas ber bi platformê ve diçûn û rayedaran jî nedikarîn pêşî bigirin, yek ji berpirsan ji ser dikê wisa bang kir: "Ji bo xatirê Ocalan gavek bi paş ve herin, em nikarin bernameyê bidomînin."

- Gel ji bo Rojava her bi diruşm û çepikan li ser piyan bûn. Diruşmên "Rojava dimeşe, erd û ezman diheje", "YPG dimeşe, erd û ezman diheje" bilind kirin.

- Sirri Sureyya Onder jî di axaftina xwe de bal kişand ser Rojava û got: "Li Rojava kurd ne ji bo kesî, yekem car ji bo xwe têdikoşin. Yên dij derdikevin vê yekê fêm nakin."

- Di dema axaftina Onder de gel diruşma "Bijî Serok Apo", "Silav, silav hezar silav ji bo Îmralî" bilind kir, Onder wisa bersiv da: "Silavên we ser çavan. Di hevdîtina yekemîn de ezê silavên we, tevî wê coşa we ragihînim."

- Heyeta ji Rojava ku hatibû jî di mîtînga Newrozê de cihê xwe girt. Serokê Kantona Cizîrî Ekrem Huso axaftineke kir û got: Dê xweseriya me pirsgirêka kurdan, ereban, suryanan çareser bike. Em bi hêvî ne dê gelê me yê Bakur jî xweseriya xwe ava û îlan bikin. Em hêvî dikin Newroza 2014'an bibe Newroza yekîtiya kurdan li çar parçeyan. Îro çar parçe li serketina li Bakur dinêrin, li benda serketina Bakur in. Serketina Bakur dê bibe serketina Rojava jî. Ev Newroz, Newroza Abdullah Ocalan e.

- Hevserokê BDP'ê Selahattin Demirtaş jî axivî û got ku emê zaliman ligel zilma wan di sindoqan de bifetisînin. Ji ber vê yekê li her derê gelê me bi heyecan li benda 30'ê adarê ye.

Demirtaş rexne li TRT'ê ku bi baca gel weşanê dike lê cih nade mîlyonan jî kir û xwest midûrê TRT'ê îstîfa bike. Demirtaş rexne li çapemeniya tirkan a navendî jî kir ku cih nadin wan û got: Ew cih nedin jî Stêrk TV'yê me heye. Em sipasiyên xwe ji bo Stêrk TV, İMC, Hayat Tv, û endamên çapemeniyê yên din dikin.

- Piştî Newrozê di rûyê her kesî de coşek, serketinek hebû. Kêfxweşiya piraniya gel, tijebûna qadê her kes kêfxweş kiribû. Kurdên Stenbolê bi vê kêfxweşiyê vegeriyan malên xwe.

***

Nûçeya eleqedar: 

- Bi wêneyan Newroza Stenbolê ya 2014'an