Kamer Soylemez
 

AKP û cemaat nî rozan de verva jûvînî herb kenê. Xizir pêdest ra kero. Belka jûvînî kenê zar û neçar ma zî guçikêde xeleşîme. Hata nika hurdemîne verva kurdan dapêro û bi hezaran kurdî kerdî mexdur. Bi hezaran însanê kurdî kiştî, bi hezaran kurdî eştî zîndanan.

Ma, kurdî gune qeyta jû hetî rê yardim nêkerîme. Wastena ma awa ke hurdemena teqete ra waroginê. Çike înan ra ke jû na herb ra bi quwete vejiya, onca verê xo çarneno kurdan. Nîka hurd hetî wazenê kurdan bioncê hetê xo. La ma zoneme ke yê hurdemîne derheqê mesela kurdî de fikrê xo jûvînî ra dûrî niyo. Nika tenge derê, coka onca dormê kurdan de çerexînê.

Vajîno ke AKP wazena mesela kurdî halbikero, la Cemaat nêverdano. Na rast niya. AKP dest de xeyle waxt û firsad bî. Hama nêwast na mesela bingehine yê Tirkiya halbikero. AKP mesela kurdan berde teslîmê polîsanê Cemaatî kerde. Polîsanê Cemaatî Kurdîstan de teror vayda. Serokwezîro tirk Recep Tayyîp Erdogan zî kerdena polîsan rê wayîr vejiya. Polîsê tirkî aya ke nêbiye şarê marê kerde, la AKP reye xora pers nêkerd, “nî polîsî kurdan rê ça honde zulm kenê.”

Coka van, ma zî reye verg bîme û roza miz û dumane bipîme. Qeyta jû hetî rê yardim nêkerîme. Ma zoneme ke Recep Tayyîp Erdogan çiqaske beno quwetin honde mexmuriye keno. Fetullah Gulen zî hora wazeno kurdan koçikê awe de bixenekno. Hereketê Fetullah Gulen hereketode nijadperest o, AKP zî na hereket ra cer niya.

Jû zî nika mavênê hukumatê tirkî û rayverê qomê kurdî Abdullah Ocalanî de qeseykerdîsî estê. Yanî werte de jû masa esta. Serokwezîro tirk Recep Tayyîp Erdogan gune quwetin na masa meyero. Waxtoke bi teqetade xirte ame, o waxt kurdan de ebi na quwete qeseykeno. Kurdî seweta quwetin biyayena Erdogan îmkan ci medê. 

Hata operasyonê 17ê gaxane Cemaat û AKP birayî bî. Waxtoke qutiyê postalan vejiyayî werte, AKP verva Cemaatê Fetullayî kewte dewre. Ma zoneme ke no herbke qediya, verva kurdan hurdemena onca benê birayî. Û ma zoneme ke derheqê mesela kurdî de Cemaat, AKP, MHP û CHP pêro hemfikir yê. Na semed ra resmê girsî de dewleta tirkî na herbê birayan ra gune darbe bijero û quwete ra warogino. O waxt masa de destê kurdan beno quwetin. Halkerdena mesela kurdî teyna estbiyayena hukumatê AKP ra giredaye niya. Endî kamij hukumat yeno va bêro, seweta halkerdena mesela kurdî  mejburiyo dest ci erzo. Çika hata nika hukumatêke ameyî û mesela kurdî halnêkerde, peyniye de ebi xo hal bî. 

verozkamer@hotmail.com

Yenî Ozgur Polîtîka