Diyarname
Pirtûka nivîskarê me H. Kovan Baqî ya bi navê "Torosa Spî" ji Weşanên J&J'yê derket.
Nivîskar H. Kovan Baqî bi pirtûkek din a çîrokan li pêşberî xwendevanan e. Wî heta niha 9 pirtûk çap kiribûn; didu jê çîrok bûn û "Torosa Spî" sêyemîn pirtûka wî ya çîrokan û 10'emîn pirtûka wî.
Pirtûk bi navê "Torosa Spî, Çîrokên Bê Nasname" hatiye weşandin. Di pirtûkê de "Torosa Spî", "Wext", "Dêya min pezkovî ye", "Ne erê ne na", "Sisê kêm dudu", "Xane" û "Tazî" 7 çîrok cih girtine. Kovan Baqî di nivîsê de xwedî şêwazeke cuda ye, çîrokên xwe jî bi vî awayî, bi vî şewazeke cuda nivîsandine.
Eyşana Beravî ji bo çîrokên Baqî li ser pirtûkê wiha nivîsiye: "Çîrokên H.Kovan Baqî, zemên û zimên dikin hêlekaneke pirralî; hem li vî alî, hem li hemû alîyên dî. Zeman û ziman di rêwitîya hafizeyê de dibin trajedî, trajedî dibe Torosên spî û spî dibe şeva tarî. Spî tarîtir e ji tarîyê.
Kîso dilezîne bona ji goristanê bibihure û xwe bigihîje beza çîrokên hişê xwendevên... Lê Kîso çiqas dimeşe, goristan di sekna xwe de ewqas firehtir dibe, laşê welêt dixwe û welat di zemên û zimên de dibe zindîbûneke ebedî."   
H. Kovan Baqî kî ye?
H. Kovan Baqî di sala 1972’yan de li Herêmya ya Dêrika Çiyayê Mazî ya Mêrdînê hatiye dinê. Dibistana seretayî li Herêmya/Dêrikê xwend û dev ji xwendina dibistanê berda. Baqî ji sala 2004'an ve li Îzmîrê dijî, ligel karê nivîskariyê, karê edîtorî û redaksiyonê jî dike. Baqî, ev demek e wekî qunciknivîskar ji bo Diyarnameyê jî dinivîse. 
Pirtûkên wî yên ku heta niha derketine:
- Çîroka Çîrokan / Çîrok / 2004 / Weşanên Bajar
- Bêexlaq / Çîrok / 2012/ Weşanên Na
- Heteroglossîa / Roman / 2014 / Weşanên Ronahî
- Aporîa / Roman / 2015 / Weşanên Na
- Dîfferance / Roman / 2016 / Weşanên Na
- Sî'bera Zeyno / Roman / 2017/ Weşanên J&J
- Kî / Roman / 2019/ Weşanên J&J
- Orok / Roman / 2020/ Weşanên Lîs
- Olmeyi Beceremeyen Hiç / Roman / 2018 / Weşanên J&J
- Torosa Spî / Çîrok/ 2024 / Weşanên J&J

- Torosa Spî / H. Kovan Baqî/ Weşanên J&J / Çîrok/ 64 rûpel / 2024