Abdullah Bîlen - Hewlêr

Her du meclisên rojavayê Kurdistanê "Meclisa Gel a Rojavayê Kurdistanê (MGRK) " û "Encumena Nîştîmanî ya Kurdî li Sûriyeyê (ENKS)" li Hewlêrê peymanek mor kirin û yek ji xalên peymanê ew e ku Heyetek Bilind a ji her du meclisan were sazkirin. Hevserokê Meclisa Gel Ebdulselam Ehmed ragihand ku armanca wan ew e ku mafên kurdan bi makeqanûna nû ya Sûriyeyê bê mîsogerkirin û got; “Armanca me ew e ku em şoreşa gelê Sûriyeyê bi rêyên aştiyane bi ser bixin.

Her wiha em dixwazin ev rejîm ji herêma gelê me were hilweşandin.”

Şandeya Meclisa Gel a Rojavayê Kurdistanê û ENKS’ê bi vexwendina Serokê Herêma Kurdistanê Mesûd Barzanî çûbûn başûrê Kurdistanê û gelek hevdîtin pêk anîbûn. Piştî hevdîtinên di navbera Serokê Herêma Kurdistanê Mesûd Barzanî û her du Meclisan de, şandeya rojavayê Kurdistanê hevdîtinên girîng bi partî û rêxistinên din ên başûrê Kurdistanê re jî pêk anîn. Di encama hevdîtinan de "Peymana Hewlêrê" ya ji bo yekîtiya kurdan li rojavayê Kurdistanê hat morkirin.

Hevserokê Meclisa Gel a Rojavayê Kurdistanê Ehmed der barê naveroka peymanê de ji ANF’ê re axivî û got; “Naveroka wê li ser peymana li Hewlêrê bû. Dîsa berî vê di meha şeşan de li Hewlêrê îtîfaqek çêbûbû di navbera her du meclisan de. Li ser wan xalan hat sekinandin. Di peymanê de biryar hat dayîn ku Heyetek Bilind bi navê “Desteya Kurdî ya Bilind” di navbera her du Meclisan de bê avakirin. Wezîfeya wê jî hemû beşan bi rê ve bibe. Pênc kes ji me û pênc kes ji ENKS’ê di vê konseyê de cih digirin. Sê lijne dê bên birêxistinkirin. Ji her du meclisan jî pênc bi pênc di nava van lijneyan de cih digirin.”

MECLÎSA GEL: DIVÊ EM ŞOREŞÊ BI AŞTIYANE BI SER BIXIN

Ehmed diyar kir ku konsey (heyet) dê di asta neteweyî û navneteweyî de nûneriya kurdan bike û got; “Ev konsey dê di asta navneteyî de jî nûneriyê bike.” Ehmed wisa got; “Armanca me ew e ku em şoreşa gelê Sûriyeyê bi rêyên aştiyane bi ser bixin. Her wiha em dixwazin ev rejîm ji herêma gelê me were hilweşandin. Bi alîkariya gelên Sûriyeyê ev rejîm were hilweşandin û sîstemeke demokrat were avakirin. Divê di destûra Sûriyeyê de mafên gelê kurd bêne naskirin.”

XALÊN PEYMANÊ

Di belavoka piştî îmzekirina peymanê hat weşandin de wiha hat gotin ku ev peyman wekî berdewama Peymana Hewlêrê ya berê (11.06. 2012) ye ku bi çavdêriya Serokê Herêma Kurdistanê Mesûd Barzanî pêk hatibû. Di belavokê de ev xal hatin rêzkirin; bi armanca ku mekanîzmayên pêwîst ji bo aktîfkirina peymana berê, û amadekirina projeyeke siyasiya yekgirtî, li ser bingeha rêgezên neteweyî yên gelê kurd li Sûriyeyê, ji bo ku beşên civaka Sûriyeyê kar bi wan re were kirin, ji bo hilweşandina sîstema rejîma desthilat a ku welat gihandiye ber şerekî navxweyî, ji bo Sûriyeyeyek Demokratîk, li gorî destûreke nû ku pir neteweyan qebûl bike, bi awayeke qanûnî rêzê nîşanî gelê kurd û mafên wê yên neteweyî bide, li gorî hevpeymanên navneteweyî û çareseriya doza kurd, di çarçoveya li dijî navendîbûna siyasî, li ser bingehek ku hemû zagon û biryarên awerte were tunekirin, ji bo ku bandora wan jî were rakirin, ji bo kesên ziyan dîtine jî tazmînat bê dayîn.

Li ser vî esasî her du Melcisan civînên xwe 9-10’ê tîrmeha 2012'yan, bi çavdêriya Dr. Fuat Huseyîn (Serokê Dîwana Serokatiya Herêma Kurdistanê) pêk anîne û her du alî gihîştin van biyaran:

1- Divê Peymana Hewlêrê esas bê girtin û li gorî wê tevbigerin, madeyên têde werin pêkanîn, û ji bo pêkanînê dê mekanîzmayên pêwîst bên sazkirin.

2- Konseyeke bilind a hevbeş (Heyeyat Bilind a Kurdan) were sazkirin. Erka wê siyaseta giştî diyar bike û tevgera kurdan di vê pêvajoya bi rê ve bibe. Di çêkirina hemû komîteyan de rêgeza wekhev (5+5) û di biryaran de lihevkirin esas bê girtin.

3- Sê komîteyên pispor bi hevkariya her du meclisan (5+5) bêne sazkirin (Komîteya têkiliyên neteweyî û derve, Komîteya Xizmetguzariyê ya Meydanî û Sazkirina Seksiyonên wê li hemû bajar, navçe û gundan. Komîteya ewlekariyê û sazkirina seksiyonên wê ji bo parastina hemû bajar, navçe û gundan.

4- Divê reşkirinên li hemberî hev ên di çapemeniyê de bên sekinandin,

5- Qedexekirina hemû hewldanên tundiyê û hemû hewldanên dihêlin rewşa bajarên rojayê Kurdistanê aloz bibe, were şermezarkirin û redkirin.

6- Ligel Peymana Hewlêrê, divê ji bo pêkanîna quralan mekanîzmaya kar zelal dike, esas were girtin

7- Piştî îmzekirina vê peymanê, divê di du hefteyan de komîteyên pêwîst bêne sazkirin.

Ev peyman peymaneke yekpar e, nabe yek ji wan jî were binpêkirin.”

ME JI BO DAXWAZ Û HÊVIYÊN GELÊ XWE BINGEH DANIYE

Piştî îmzekirina peymanê daxuyaniyek hevpar ji aliyê MGRK û ENKS’ê ve hat dayîn û di daxuyaniyê de hat diyarkirin ku “mizgîniya yekîtiyê” didin hemû kurdên rojavayê Kurdistanê û her deverên kurd lê dijîn. Di daxuyaniyê de hat gotin; “Ji bo em daxwaz û hêviyên gelê me li rojava Kurdistan û Sûriyeyê pêk bînin me bingeh aniye. Çareserkirina prisgirêka kurd û yekgirtina xebatên hemû beşên siyasî ya gelê me me ji xwe re kiriye hedef.”

Di berdewama daxuyaniyê de wiha hat gotin; “Îro jî em di pêvojoyeke krîtîk û vîrajeke siyasî re derbas dibin. Ji ber wê jî divê em ref û helwesta xwe bikin yek. Ji bo em bikarin hemû guhertinên siyasî yên Sûriyeyê diqewimin, di dema pêş de pêşwazî bikin. “

JI BO BARZANÎ Û BAŞÛRÊ KURDISTANÊ SPASÎ

Meclisên Rojavayê Kurdistanê di serî de malavahiya Serokê Herêma Kurdistanê Mesûd Barzanî, Hikûmeta Herêmê û hemû kurdên başûrê Kurdistanê kir û spasiya hewldanên wan ên ji bo yekgirtina kurdên rojavayê Kurdistanê kirin.

PEYMAN DÊ ARAMIYÊ DI NAVA GEL DE PÊK BÎNE

Di daxuyaniyê de hat gotin; “Li gorî nêrînên me Peymana Hewlêrê, encama têkoşîn û fedekariya gelê me yê ku bi dehan salan êş kişandiye ye. Her wiha bi alîkariya kesên durist ên gelê me, me karî em têkoşîna hemû hêzên siyasî yên gelê kurd bikin yek, ev bûyera mezin dê hem kêfxweşî û aramiya gelê me yên fedekar ên gelê me yê ku li benda me ye pêk bîne.”

Ji ANF'ê hatiye girtin