Diyarname

Pirtûkek nû derket li ser wêjeya kurdên Sovyetê derket, "Edebîyata Kurdî ya Sovyetê". Pirtûk ji aliyê Zulkuf Ergun ve hatiye amadekirin û ji Weşanxaneya Nûbiharê derketiye.

Nivîskar Zulkuf Ergun ku ji sala 2012'an ve li Zanîngeha Artûklûyê ya Mêrdînê di Beşa Ziman û Çanda Kurdî de wekî mamoste kar dike, di bernameyên lîsans û mastir û doktorayê de dersên edebiyata nû dide. Pirtûka li ber dest jî beşek di van dersan de hatiye bikar anîn, hin beşên ji pirtûkê di kovaran de hatine weşandin û ji bo pirtûkê ji nû ve hatine sazkirin. 

9 NIVÎSKARÊN KURDÊN SOVYETÊ

Nivîskar di pirtûkê de bi ser berhemên nivîskarên kurdên Sovyetê yên wekî Erebê Şemo, Hecîyê Cindî, Elîyê Evdilrehman, Sîma Semend, Sehîdê Îbo, Egîdê Xudo, Emerîkê Serdar, Fêrîkê Ûsiv û Şikoyê Hesenî re berê xwe dide edebiyata kurdî ya li Sovyetê. Ergun berhemên van navan wekî mînak girtiye dest û mijara xwe saz kiriye. Ew dibêje, "Bi vî halî em di wê baweriyê de ne ku ev xebat ji bo nîşandayîna dîmena giştî û nasandina edebiyata kurdî ya Sovyetê dê arîkariyeke baş bide xwendevan û vekolerên edebiyata kurdî."

TAYBETMENDIYA WAN Û EMERÎKÊ SERDAN

Nivîskar berhemên wê demê wekî berhemên siyasî dibîne û dibêje, "Ji ber ku piranîya deqên debîyata kurdî ya Sovyetê di nav anonîmîya folklorîk, etnîk, îdeolojîk û jîngeheke stalînîst a behrekuj da tên berhemanîn mirov ji bilî şopên bernameyeke sîyasî ya sepandî rastî tu şopên takekesî û çavdêrîyeke rasteqîne ya civakî nayê." Lê ew vê jî lê zêde dike, "Tevî vê di mînaka Emerîkê Serdarî de hin nivîskar xwe ji bin vê sîbera reş û tarî rizgar dikin û heta radeyeke baş edebîyateke şexsî û cîyawaz berhem tînin." Loma jî wî beşeke taybet li ser Emerîkê Serdan amade kiriye.

BEŞÊN PIRTÛKÊN

Pirtûk di bin şeş beşên wekî "Destpêka edebiyata kurdî ya modern li Sovyetê", "Ducemseriya realîzma Sosyalîst di romanên Erebê Şemo û Heciyê Cindî de", "Taybetmendiyên vegêrana edebiyata kurdî ya Sovyetê"," "Fonksiyonên hevbeş û zincîreya rûdanê di vegêrana edebiyata kurdî ya Sovyetê de", "Nasnameyên edebiyata kurdî ya Sovyetê " û "Emerîkê Serdan: Dengek ciyawaz di edebiyata kurdî ya Sovyetê de" de hatine ravekirin.

- Edebîyata Kurdî ya Sovyetê / Zulkuf Ergun / Nûbihar / Lêkolîn /168 rûpel / 2023