Diyarname

PEN'a Kurd bi daxuyaniyeke nivîskî êrîşên li ser jinê û nirxên kurdan şermezar kir û li ser endamên xwe Medenî Duran jî got, "Di civîna me de ev mijar û ev kes wê bên nirxandin."

Van demên dawî bi ser tora civakî re hin kesan gotinên ne baş ji bo jinên kurd û nirxên kurdan anîne ziman. Li ser van yekan Komîteya Jinê ya PENa Kurd daxuyaniyeke nivîsî belav kir.

Daxuyanî bi vî rengî ye: 

"Jinên kurd û gelê kurd bi salan e ji bo nirxên xwe yên rûmetê, ji bo nasname û ji bo doza xwe têkoşîn û berxwedaneke mezin didin. Ji ber vî hawî jî her tim di çarçoveya şerê taybet de êrîş li wan tên kirin. Bi van êrîşana tên xwestin destkeftiyên bi salan ên jin û gelê kurd bên binpêkirin. Gelek caran jî destkeftiyên gelê kurd di qada navneteweyî de jî mixabin dibin mijara bazarê. Ev êrîşên bi awayekî sîstematîk tên kirin piralî ne. Bi binçavkirin, girtin, tundî, îşkence û her wekî din her tim hatiye xwestin têkoşîn û berxwedana tê dayin têk biçe. Bi vê yekê girêdayî li ser medyaya dîjîtal jî gelek caran êrîşên bêexlaqî li dijî jinên kurd û nirxên gelê kurd tên kirin. Em dizanin ku ev êrîşên li ser medyaya dîjîtal ji şerê taybet ê li dijî jin û gelê kurd ne cuda ne. Hinek kes jî piştgiriyê didin van êrîşan. Bila kesên êrîş dikin û yên piştgiriyê didin êrîşan baş bizanibin ku PENa Kurd her tim piştigiriya parastina destkeftî û nirxên jin û gelê kurd dike û wê her tim li dijî kesên êriş dikin û yên piştgiriyê didin êrîşan, bisekine.

Parêzer Osman Taşdemir ê qeyda wî li Baroya Stenbolê heye li ser medyaya dîjîtal gotinên zayendperest ji bo Başak Demirtaş kir. Di şexsê Başak Demirtaş de ev gotinên ji exlaq û pîvanên mirovahiyê dûr in ji hemû jinên kurd hatine kirin. Piştî parêzer Osman Taşdemir ê qeyda wî li Baroya Stenbolê heye li ser medyaya dîjîtal gotinên zayendperest ji bo Başak Demirtaş kir şûnde parêzerên Başakê diyar kirin ew ê giliyê vî şexsî bikin. Her wiha gelek kesan piştgirî dan Başak Demirtaş. Em jî wekî PENa Kurd li dijî van gotinên zayendperest û ji exlaq dûr derdikevin û dibêjin em vê yekê qebûl nakin. Her wiha vî şexsê bi navê Osman Taşdemîr heqaret û bêrûmetiyeke mezin li dijî dîlên azadiyê û li dijî nirxên gelê kurd kiriye. Em êrîş û bêrûmetiya li dijî dîlên azadiyê yên rûmeta me ne, zimandirêjiya li nirxên kurdan bi tu awayî qebûl nakin. Ev yek nayê pejirandin.

Her wiha Medenî Duran ê ku endamê PENa Kurd e jî piştgirî bi rêya medyaya dîjîtal daye vê bêexlaqî û bêrûmetiya Osman Taşdemîr. Medenî Duran, heta niha li ser navê endamtiya PENa Kurd gelek caran gelek heqeret li sazî û derdorên kurd ên welatparêz kirine. Hebûna kesên wiha ya di nava PENa Kurd de, ne li gor rêgezên PEN a Kurd û ne jî li gor pîvanên rewşenbîriya kurd e. Cihê kesên wiha di nava PENa Kurd de tune ye. Wê di civîna me de ev mijar û ev kes bên nirxandin. Li gor rêbazên me kesên li hemberî nirxên kurdan heqaretê bikin cihên wan di nava saziyên kurdan de tune ye. Loma jî di civîna me de wê ev mijar bê nirxandin û ji bo vî kesê heqaret kiriye jî wê tiştê pêwist bê kirin. Em ê tu carî êrîşên li dijî jinê û nirxekî bi milyonan kurdan nepejirînin û destûrê nedin vê yekê."