Diyarname
Herî dawî di sala 1990'î de dema Maradona li wê derê dilîst bûbû şampiyon. Tam bû 33 sal deng ji wan dernediket û niha şampiyoniya xwe ragihandin.
Em qala tîma îtalî Napoli dikin. Di lîga Îtalyayê Serîe A'yê de maçên hefteya 34'an hatin lîstin. Napolî ku ji zû de ye di rêza yekemîn de ye li mala xwe Fiorentina kir mêvan û bi 1-0 ew t êk bir. Bi vê yekê berî lîg bi dawî bibe bi 4 hefteyan şampiyoniya xwe ragihand.
Gola Napoli di deqîqeya 74'an de bi penaltiyê Victor Osimhen avêt. Bi vê serketinê de pûanên Napoli bûn 83. Juventus di rêza duyemîn de xwedî 66 pûanan e. Bi vê serketinê şampiyonê Serie A yê 2022-23'yan Napolî ye.
Piştî ragihandina şampiyoniyê bi deh hezaran alîgerên Napolî derketin kuçeyan û dest bi pîrozbahiyan kirin.
Di pîrozbahiyan de wêneyên Maradona jî hatin bilind kirin.
Li aliyê din di pîrozbahiyên şampiyoniyê de pevçûn jî derketin û li dor 100 kesî birîndar bûne.
Kesek hatiye kuştin. Kesê hattiye kuştin navê wî Vincenzo Costanzo yê 26 salî ye. Dibêjin kurê kesê payebilind ê mafyayê ye. Di dema pîrozbahiyan de hatiye kuştin lê polîsên îtalî dibêjin eleqeya bûyerê bi pîrozbahiyan re nîn e, lê dibe ku ji pîrozbahiyan sûde girtine û pevçûne.
DÎROKA NAPOLÎ
Tîma Îtalî Napolî di sala 1926'an de hatiye avakirin. Maçên xwe li Stada Diego Armando Maradona dilîze ku cihê 60 hezar û 240 kesî têde heye.
Di salên 1980'yan, destpêka 1990'i de navdar bû, serketî bû. Di sala 2004'an de tîm çû îflasê. Ji lîgan ket, heta lîga sêyemîn jî daket.
Di sala 1986-87 û 1989-90'î de li Serie A'yê bûye şampiyon. Bi şampiyoniya niha re bû 3 caran dibe Şampiyonê Serie A'yê.
Ji bilî van di Kûpaya Îtalya de 6 caran bi ser ketiye. Di Kûpaya Super a Îtalyayê de 2 caran bi ser ketiye. Û di Kûpaya UEFA'yê (Niha Lîga Ewropa ye) carek (1988-89) bûye şampiyon.
GOLAVÊJÊ WAN
Îsal lîstikanê wan yê ji Nîjeryayê Victor Osimhen di 27 maçan de lîst, 22 gol avetin. Ew niha li Serie A'yê yekemîn e.
Teknîk dîrektorê tîmê Luciano Spalletti yekem car di Serie A'yê de dibe şampiyon. Wî berê tîmên wekî Empoli, Sampdoria, Venezia, Udinese, Ancona, Roma, Zenit û Inter bi rê ve biribûn.
ROJNAMEYÊN ÎTALÎ
Ji rojnameyên îtalî Corrie dello Sportê manşeta "Napolî şampiyon e. Li bern çong vedin" bikar anî û got ku şamponiyeke bêhempa ye.
La Gazzetta dello Sportê jî got, "Napolî li bihuştê ye."