Diyarname
PEN’a Navneteweyî 88'emîn Kongreya xwe di 27'ê rezberê de li bajarê Uppsalayê li dar xist û biryar da ku divê zimanê kurdî li Tirkiyeyê bibe zimanê perwerdeyê. 

Navenda PEN’a Kurd jî bi awayeke fermî beşdarî kongreyê bû. Seroka Rûmetê ya Navenda PEN’a Kurd Dr. Bêrîvan Doskî, endamê salan ê Navenda PEN’ê Abdullah Hîcab û Serkan Birûsk li ser navê PEN'a Kurd bi awayeke fermî beşdarî kongreyê bûn. 

Di kongreya de du pêşniyazên Navenda PEN’a Kurd jî hatin pejirandin û bûn biryar. Li gorî pêşniyaza Navenda PEN’a Kurd, PEN’a Navneteweyî biryar girt ku divê li Tirkiyeyê zimanê kurdî bibe zimanê perwerdehiyê û divê piştgiriya gelên kurd û Îranî bê kirin. Pêşniyara din a PEN’a Kurd û çend PEN'ên din jî ew bû ku piştgiriya gelê kurd û gelên Îranî bê kirin. Ev pêşniyaz jî bi awayeke fermî hate qebûlkirin û PEN'a Navneteweyî piştgiriya xwe ji bo wan eşkere kir û biryar girt.

Bêrîvan Doskî piştî van biryaran di Radyoya Swêdê Beşê Kurdî de bo Beşîr Kavak axivî û diyar kir ku pejirandina biryara daxwaza perwerdehiya zimanê kurdî li Tirkiyeyê, tê wê maneyê ku qadeke navneteweyî ya nivîskarî û rewşenbîrî ya girîng piştgiriya vî mafê te yê rewa kiriye û daxuyaniya vê biryarê bûye milkeke saziyeke navneteweyî û ev dokûment tiştekî gelekî buha ye ji bo bikaranîna pêşvebirina mafên rewa yên gelê kurd.
Derket holê ku PEN’ên cîhanê li Uppsalayê piştgiriyeke gelekî xurt nîşanî xebat û çalakiyên Navenda PEN’a Kurd dan. Di dawiya kongreyê de diruşma ‘Jin, Jiyan û Azadî’ ku li ser dehan pankartên bi zimanê îngilîzî hatibû nivîsandin û ji aliyê heyeta PEN’a Kurd ve hatibû amadekirin, li beşdaran hate belavkirin.