Diyarname
Nivîskar Harbî Soylu ku gelek salên dirêj di girtîgehê de ma pirtûka xwe ya yekemîn derxist.
Pirtûka Soylu bi navê "Koçera Kej" ji Weşanên Avestayê derket. Nivîskar Harbî Soylu di destpêka salên 90'î de hat girtin û li dor deh salan di girtîgehê de ma. Soylu ku di girtîgehên wekê Amed, Entab û Bartinê de ma, dema girtî bû çîrokên xwe ji bo weşanên wekî Azadiya Welat û Jiyana Rewşenê re dişand. Heta niha wî bi çîrokên xwe xelat jî girtibû. Xwendevanên kurdî ku Soylu ji wê derê nas dikin vê carê pirtûkek wî derket.
Vaye kurteyeke ji “Koçera Kej”:
Serê vê sibehê bêhna te û bêhna payîzê bi hev re bi ser min de tê, bi bayê ecem re. Ev çend demsal in ez ji te û ji bêhna te, ji bedewbûna te, ji xeml û rewşa te bêpar û bêxeber im. Ez bîra te dikim. Bîra zaroktiya te, bîra bedewbûna te û bêhna porê te dikim.
Çend sal in te nabînim? Nizanim, gelo ez qet dikevime bîra te an na? Gelo tu jî qet bîra min dikî an na?
Payîzeke sar bû. Cot û cobar xelas bibûn. Zozan daketibûn deştê. Koçeran koçên xwe bar kiribûn, ber bi welatê jêrê diçûn. Wê demê bi kesereke giran, koça min jî bar kiribû, koçera min a kej. Dema malbavên te konên xwe pêçan, wê demê te jî konê evîna min pêça û danî pişt sitûnê. Wê demê xem û xeyalên min, bi te re ketin xurca li ser pişta hêstira we ya boz û bi te re li çol û mexelan geriyan. Nizanim te li çend waran danî? Dibe ku te qet ji ser pişta hêstirê jî daneynin.
Koçera Kej / Harbî Soylu / Çîrok / 112 rûpel