ENQERE
Vê hefteyê ji dêvla hevserokan mebûsê BDP'ê yê Batmanê Bengi Yildiz axaftina destpêkê ya Koma Meclisê ya BDP'ê kir. Yildiz axaftina xwe ji serî heta dawî bi kurdî kir.

Her hefte roja sêşemê partiyên ku koma wan li meclisê heye axaftinê dikin. Vê axaftinê jî serokên koman dikin. Vê hefteyê di Koma BDP'ê de guherîneke çêbû û ji dêvla hevserokan mebûsê BDP'ê Yildiz axaftina destpêkê ya komê kir. Yildiz got ku ji ber dadgehên li Amedê kurdî wekî "Zimanê nayê zanîn" bi nav kir û wisa di qeydên dadgehê de nivîsîn, ew bi kurdî diaxive.

Yildiz, got ku redkirina parastina bi kurdî li dijî mafên mirovan û hiqûqa navneteweyî ye.
Bengî Yildiz, nêzî 10 deqîqiyan bi kurdî axivî û got ku kurdî zimanekê gelekî ye û ferhenga kurdî û tirkî ya Enstîtuya Kurdî ya Stenbolê ku Zana Farqînî amade kiriye nîşanî meclisê da.

Mebûsê BDP'ê Yildiz, destnîşan kir ku dê ji niha û şûnde hemû qadên xebatê bikin kurdî.

Yildiz wisa got: "Serokwezîr dibêje 75 mebûsên min hene. Li Ewropayê û li Tirkiyeyê, li herêmê propagandaya vê yekê dike lê li Amedê dadgeh dibêje ku kurdî zimanekî nayê fêmkirin e lê ew mebûs tiştekî nabêjin. Ev şerm ji bo mebûsên AKP'ê bes e."

Piştî ku Yildiz axaftina xwe temam kir, Hevseroka BDP'ê Gultan Kişanak derket ser dikê û axivî.

Kişanak: Emê dest ji tirkî berdin

Hevseroka BDP'ê Kişanak jî di axaftina xwe de bal kişand ser kurdî û got: "Ger tirkî li pêşberî zimanê me kurdî asteng be emê dest ji tirkî berdin û êdî bikar neynin."