Diyarname

Helbestvan Arjen Arî vê carê bi pirtûkek din, bi "Bîhoka li pişt sînor" derket pêşberî xwendevanên xwe. Pirtûka Arî ji Weşanên Avestayê derket.

Dirêj an jî kurt, her jiyîn li dev xwediyê xwe xwediyê xwe û çîrokekê ye.

Dîkekî min hebû ku her sihar bi hilatina spêdeyê re li hewşê dikir qûqû... qûûû, û pîreke min, ku her êvar ji serboriya xwe ya têr karesat qetek jê bi çîrokî vedigot!

Her ku min li çîroka pîrê guh didêra, li bendî bûm ku ne çîroka xwe, çîroka Dîko vebêje ji min re...

Lê wê; heçku bixwaze min jî bike şirîkê serboriyên xwe, hercar guhkê buxçika êşa xwe bi vê peyvê vedikir: Xwedê heqê me nehêle, kurrê min...

Ji ber heq û neheqiyê bû gelo, min ji çîroka Dîko û Pîrê hez dikir?

Di herdu çîrokên gelerî de jî -Dîko û Pîrê, Şengê û Pengê- tolwergirtin hebû, û di herdu çîrokan de jî yên neheq: Gur û pîrê di dawiya çîrokê de bi ser ‘heqê’ xwe ve dibûn...

Soxî; piştî zarokatiyeke tiştîşî û jiyaneke zîvar zîvarî, di ber şairtiya xwe ya kulek re ez jî bi ser çîroka xwe ve bûm:

Hinekî bîranîn, hînekî çîrok...

Belê nivîskarê malpera me Arjen Arî ku heta niha 6 pirtûkên helbestan û yek jî antolojiyeke helbestan pêşkêş kiriye niha bi vê pirtûkê hinek bîranîn, hinek çîrokan pêşkêş dike.

Arjen Arî kî ye?

Nivîskar û helbestvan Arjen Arî di sala 1956'an li herêma Omeriya, li gundê Çalê hatiye dinyayê. Di sala 1979'an de Enstituya Perwerdeyî ya Diyarbekirê Beşa Zimanê Tirkî qedand. Wekî gelek şa'ir û nivîskarén kurd wî jî bi tirkî dest bi helbêstê kir. Di sala 1976'an de li Nisêbîné ji ber belavkirina belavokekê hat girtin. Wê demê polîsan dest danîn ser helbestên wî yên bi tirkî û kurdî.

Heta niha di weşanên wekî Berbang, Kurdistan Press, Nûdem, Çira, Pelîn û Rewşenê helbestên wî hatine weşandin. Di sala 1992'yan de li navçeya Nisêbînê li ber deriyê mala xwe rastî êrîşeke çekdarî hat. Ew birîndar rakirin Nexweşxaneya Zanîngeha Dîcleyê. Ji wê bûyerê ve li Amedê dijî.

Berhemên wî:

Ramûsan min veşartin li geliyekî, Helbest, Avesta, 2000
Ev çiya rûspî ne, Helbest, Avesta, 2002
Destana Kawa, Helbest, Weşanên Elma, 2003
Eroûtîka, Helbest, Weşanên Lîs, 2006
Bakûrê Helbestê/Antolojiya Helbesta Bakûr, Weşanên .Yekîtiya Nivîskarên Kurd a Dihokê, 2007
Çil Çarîn, Helbest, Weşanên Enstîtuya Kurdî ya Amedê, 2008
Şêrgele, Helbest, Avesta, 2008

Bîhoka li pişt sînor / Arjen Arî / Weşanên Avesta / 120 rûpel