Zekî Ozmen

Di roja me de teknolojî her ku diçe zêdetir ber bi pêş ve diçe. Heta niha yên ku nedikarîn xwe bigihînin helbest û stranên bi kurdî niha bi pêşketina teknolojiyê û bi sazkirina sepanan re êdî bi hezaran helbest, her wiha stranên bi kurdî ligel gotinên wan bi telefonan dikin bêrîka xwe û kengê bixwazin dikarin derxin bixwînin, guhranî û temaşe lê bikin. Ji van du sepan hene ku derketine pêş. Du sepanên mergesoftê ne. Mergesoft komeka ji ciwanên kurd ên dildarê kurdî pêk hatiye. Heta niha gelek sepanên kurdî yên baş amade kirine. Du heb ji van pir muhîm in. Yek Asoya Helbesta Kurdî ye, ya din jî Gotinên Stranan e.

Bi Asoya Helbesta Kurdî bi hezaran helbest

Ji alîyê Rênas Xendekî û Mazlum Ozdogan ve hatiye amadekirin. Danberheva helbestan, serastkirina wan ji hêla Rênas ve, alîyê teknîkî jî ji aliyê Mazlum Ozdogan ve tê dirustkirin. Di navê vê de niha bi hezaran helbestên bi kurdî hene. Li ser armanca Asoya Helbesta Kurdî Rênas Xendekî wisa dibêje: "Bi pêşketina teknolojîyê ve girêdayî, tesîra zêde zêde ya jîrfonan (telefonên baqil) di jiyana me ya rojane de berbiçav e û ev her diçe zêdetir dibe, bi vê re êdî rahiştina pirtûkeka ji rûpelên kaxizî her diçe kêm dibe, ev bandoreka neyînî ya teknolojîyê ye. Lê pêre pêre êdî e-pirtûk, e-maîl, blog, quncik, malper dikevin şûna kaxiz. Yek ji van platforman jî sepanên telefonan e. Axir me xwest em karibin dîwana Melayê Cizîrî di bêrîka xwe de bigerînin, me xwest hevalek dema heza xwendina helbestê hatê ji bêrîka xwe bi hezaran helbestan derxe û ji derdora xwe re bixwîne. Me xwest ciwanên zanîngehan dema li hev kom bûn karibin xwe bigihînin arşîveke helbestan a kurdî jî. Me xwest dema kurdek ji welatê xwe dûr ket, çû Çînê, berbangenkê dema ji xewka şîrîn hişyar bû karibe helbesta Rojen Barnas - Rojbaş Roza bi hêsanî bixwîne."

Li gor agahiyên ku Xendekî dide di sepanê ji 455 helbestvanan 3130 helbest hene û ew vê lê zêde dike: "Ev ne hejmareka hindik e. Ji bilî wê ji 100'î zêdetir vîdyo-helbest hene, li ser hesabê me yê YouTube'ê, helbet di sepanê de jî vedibin. Di sepanê de bi dehan dîwanên klasîk, dosyeyên helbestan hene; ji Baba Tahirê Uryan heta Melayê Cizîrî û Ehmedê Xanî, ji wir heta Cegerxwîn û Fêrîkê Ûsiv û Osman Sebrî, ji wir heta Dost Çiyayî, Rênas Jiyan, Gulîzer, Fatma Savci, Arjen Arî, Kawa Nemir û gelekên din, hemû di têlefona we ya destan de, bi qasî 10 mb'î ye."

Li gor gotina Rênas Xwendekî her roj ew hewl didin antolojîya xwe dewlemendtir bikin û wisa gotina xwe temam dike: "Em roj bi roj helbestan lê bar dikin, arîşeyên sepanên xwe ku derkevin tesbît dikin û çareser dikin, bi vî awayî sepana xwe berdewamî nû dikin, nûjentir dikin."

Bi hezaran Gotinên Stranan

Ev sepana "Gotinên Stranan" ji aliyê Mazlum Ozdogan ve hatiye amadekirin. Bi alîkariya hevalên wî yên din jî xurtir dibe. Ew wisa dibêje: "Gelek sepan û malperên xelkê yên gotinên stranan hene. Vê paşiyê çend malperên kurdî jî vebûn. Lê niha êdî sepaneka nûjen a gotinên stranan bi kurdî heye. Di sepana me de 3342 stran, 431 stranbêj hene.

Bi sepana me stranbêjek dikare di bêrîka xwe de repertûareke mezin, dewlemend peyda bike. Ciwanên zanîngehan dikarin di şevên dirêj de bi arşîva me ya berfireh sebra xwe pê bikin."

Ew dibêje xebatên wan dom dikin û van lê zêde dike: "Em niha tenê li ser Androidê ne. Ji ber ku malmîrata IOS'ê qutîyeka girtî ye, heta niha derfetên me tune bûn, ku em xse bigihînin bikarhênerên IPhone'ê. Lê Xwedê hez bike em ê bikarin destê xwe bidin destê wan jî."