ENQERE

Hevserokê Giştî yê HDP'ê Selahattîn Demîrtaş di civîna Meclisa Partiyê ya HDP'ê de got ku Tirkiye gav bi gav ber bi bobelatek ve diçe û ev yek lê zêde kir: "Kurd ne bêçare û perîşan in. Bila biborînin lê yê ku bêçaretiyê û bêhêvitiyê dijî rojavayê Tirkiyeyê ye. Divê em hemû bi hev re hêviya berxwedanê mezin bikin." Hevseroka Giştî ya HDP'ê Fîgen Yuksekdag jî di axaftina xwe de diyar kir ku ewê ji bo avakirina rêveberiya cewherî têbikoşin. 

Endamên Meclisa Partiyê yên Partiya Demokratîk a Gelan (HDP) ên ku di 2'emîn Kongreya Asayî de hatin hilbijartin, ligel Hevserokên Giştî yên HDP'ê Selahattîn Demîrtaş û Fîgen Yuksekdag yekem car li Enqerê civiyan. 

Axaftina destpêkê ya civînê Hevseroka Giştî ya HDP'ê Fîgen Yuksekdag kir. Yuksekdag bal kişand ser şert û mercên giran ên siyasî û rola HDP'ê. Yuksekdag diyar kir ku ewê wekî HDP li hemberî hewldanên dîktatoriyê têkoşîna aştî û azadiyê bimeşînin û dê dîktatorî têk biçe. 

Yuksekdag got ku pêdiviya eniyeke hevpar a demokrasiyê heye û wiha axivî: "Emê bibin riya ku Tirkeye bigihe komara demokratîk. Ji bo vê jî divê siyaseta demokratîk bê sazûmankirin. Em dixwazin ku ev rejîma siyasî bi awayek demokratîk ji nû ve were ava kirin."

Yuksekdag diyar kir ku ewê li hemberî hêza dewletê, hêza yekgirtî ya gelan nîşan bidin û wiha dom kir: "Ji bo me parastina demokrasiya herêmî, rêveberiya cewherî erkê parastina bernameya demokrasiyê ye. Em ê xwe ji nû ve birêxistin bikin û di vê pêvajoyê de bimeşin."

Piştî Yuksekdag, Hevserokê Giştî yê HDP'ê Selahattîn Demîrtaş axivî û got bi kongreyê re ji bo bo dema nû wan xwe amade kiriye. Demîrtaş, der barê nasnameya HDP'ê de jî nirxandin kir û got: "Li Tirkiyeyê ji bilî me partiya Tirkiyeyê tune ye."

Demîrtaş balê kişand ser êrîşên li ser HDP'ê jî û wiha axivî: "Ji ber ku me mudaxaleyek radîkal pêş xistiye ditirsin. Ji bo civakeke ku bikaribe xwe bi rê ve bibe ava em ketine ser rê, ji ber vê yekê em rastî êrîşan tên."

Demîrtaş ji bo siyaseta Serokomarê Tirkiyeyê Recep Tayyîp Erdogan dimeşîne jî rexneyên tund anîn ziman û  û got Erdogan ne li ser esasên qanîkirina demokratîk lê bi hêz, zext û gefan dixwaze pergala serokatiyê û zagoneke bingehîn li gor xwe bi dest bixe. Demîrtaş her wiha gotina Erdogan a "Kê daxwaza xweseriyê, xwerêvebirinê bike emê cîhanê bi serê wî de xira bikin" jî bibîrxist û got: "Ji bilî modela ku ew pêşniyar dike her tişt qedexe ye. Li Cizîr, Sûr û Nisêbînê cîhanê bi serê însanan de xira dike."

Demîrtaş balê kişand ser rewşa aloz û hişyar kir ku Tirkiye ber bi bobelateke mezin ve diçe û wiha berdewam kir: "Em gav bi gav ber bi bobelatê ve diçin. Tu dibê qey Serokomar ji bo şerê navxweyî leztir bike çi ji dest tê dike. Her roj zêdetîr pêl li gazê dike."

Hevserokê HDP'ê Demîrtaş der barê birîndar û cenazeyên li Cizîrê ku di qata jêrzemîn a avahiyekê de asê mane de jî axivî û got "Dibêjin qey ev serkeftineke mezin a leşkirî ye. Her êvar di televîzyonan de wiha vedibêjin."

Selahattin Demîrtaş di dawiya axaftina xwe de der barê bêdengiya rojavayê Tirkiyeyê de jî nirxandin kir û wiha dawî li axaftina xwe anî: "Eger dibêjin bila kurd li çareya serê xwe binêrin, encamên cuda ji wir dertên. Ne ku kurd bêçare û perîşan in. Bila biborînin lê yên ku bêçaretiyê û bêhêvitiyê dijî rojavayê Tirkiyeyê ye. Divê em hemû bi hev re hêviya berxwedanê mezin bikin."

Piştî axaftinên hevserokan, civîn ji çapemeniyê re girtî berdewam dike.