Cemil Oguz

Fîlmê Kazim Oz "Firtone" ku heta niha temaşevan bi meraq li bendê bûn yekem car dê li Festîvala Fîlman a Stenbolê de bê nîşandayîn. Her wiha fîlmê Reis Çelik "Mülteci" û "Gîtmek" ê Huseyin Karabey her du jî li ser kurdan in, ew jî beşdarî festîvalê dibin.

Festîvala Fîlman a Navneteweyî ya Stenbolê ku ji aliyê Weqfa Çand û Hunerê ya Stenbolê ve tê li dar xistin îsal 27'emîn car li dar dikeve. Festîvala ku di navbera 5-20'ê avrêlê de dê li dar bikeve vê hefteyê bernameya wê eşkere dibe. Lê hin agahiyên ji bernameyê gihîştin ber destê me jî. Li gor agahiyên ku me bi dest xistin fîlmê Kazim Oz "Firtone", yê yekemîn fîlmê metrajdirêj ê Huseyîn Karabey "Gîtmek" (Çûyîn), fîlmê Reis Çelik "Multeci" (Penaber) ku niha li vîzyonê ye û filmê Çağan Irmak "Ulak" dê di festîvalê de di beşa Pêşbaziya Neteweyî de bêne nîşandayîn. Festîvala ku fîlmên berendamên Oscarê jî têde hene, fîlmên li ser kurdan jî dike mêvanê xwe.

‘Firtone’ qala salên 1990’î dike

Derhêner Kazim Oz bi kurtefilmê xwe "Ax" dest bi sînemagerî kir û gelek xelat berhev kir. Dûre di sala 2001'ê de yekem fîlmê xwe yê metrajdirêj kişand. Oz ku heta niha ji bilî "Dûr" û "Şavak" ku her du jî belgefîlmin di warê fîlmên metrajdirêj de bêdeng ma û ew niha bi "Firtone"yê dawî li bêdengiya xwe tîne.
Derhêner Oz di "Firtone"yê de li ser serdemekê disekine. Di salên 1990'î de ku têkoşîna kurdan gur bû, li zanîngehan ciwanan jî çalakî pêk dinanî, têkoşîn didan, saziyên kurdan dihatin vekirin... Fîlm vê serdemê pêşkêşî temaşevanan dike. Oz niha li ser kîteyên dawî yê fîlm dixebite ku bigihîne festîvalê.

Evîna kurd û tirkek: Çûyîn

Yek ji fîlmê ku di beşa pêşbaziyê de ye jî fîlmê Huseyîn Karabey "Gitmek" e. Karabey ku bi belgefîlmên “Sessiz Olum”, “Boran” tê nasîn, di vî fîlmî de jî çîroke belgefîlmwarî pêşkêş dike.
Kurdek ji Başûr Heme Elî Xan û tirkek Ayça Damgaci di seta fîlmekî de rastî hev tên û evîndarê hev dibin. Fîlm ku çîroka wan a rastîn vedibêje Damgaci û Xan jî di heman çîrokê de rola xwe ya rastîn dilîzin. Her wiha hin karakterên din jî bi vî rengî. Fîlm ji aliyekê ve qala çîroka evîna wan dike, ji aliyê din ve rewîtiya ji Stenbolê heta bajarên kurdan, heta Silêmanî, Urmiyeyê pêşkêş dike.

“Penaber” li ser penaberiyê disekine

Reis Çelik ku bi fîlmên xwe “Hoşçakal Yarin”, “Işiklar Sonmesin” bala raya giştî kişand ser xwe, vê carê dest davêje pirsgirêkek din a civakî: Penaberî. Çelik ku bi navê "Multeci (Penaber)" fîlmek li ser penaberan kişandiye dibêje, "Ziman, ol, nijada penaberiyê nîn e."
"Penaber" ku li ser kurdê axayekî kurd ê li Qersê, li ser çîroka Şivan e bi kurdî û tirkî ye.
Şivan ku ji ber zor û zexta hêzên ewlehiyê dev ji warê xwe ber dide û diçe Almanyayê dest bi jiyana penaberiyê û pirsgirêkan dike.