AMED
Hevseroka KCD’ê Selma Irmak got: "Paşgotinên wê gelê me yê Êzîdî van deran terk bike belav dikin û hewl didin bi vî awayî mirovan ji vir derxin. Dixwazin li ser hestên van mirovan siyasetê bikin. Gotina vê ya herî sivik bê însafî ye.”
Hevseroka KCD’ê Selma Irmak û Parlamentera HDP’ê ya Amedê Feleknas Uca çûn serdana êzîdiyên ji ber êrîşên çeteyên DAIŞ’ê warê xwe terk kirine û li Kampa Husnu û Cîhan a li Qada Mesîre ya Şaredariya Yenîşehîra Amedê bicih bûne.
Hevseroka KCD’ê Selma Irmak da xuyakirin ku par bi hezaran êzîdî ji Şengalê hatin herêmê û got: “Ji bo ji travmaya têde ne bên rizgarkirin me derfetên xwe seferber kirin.”
Irmak da xuyakirin ku pêwîstiya êzîdiyên li kampan dijîn xaniyên bi tendurist in û li ser vî esasî hewl didin pêdiviyên wan bînin cih û wiha dom kir: "Hin kes van şert û mercan bi kar tînin. Paşgotinên 'wê gelê me yê êzîdî van deran terk bike' belav dikin û hewl didin bi vî awayî mirovan ji vir derxin. Dixwazin li ser hestên van mirovan siyasetê bikin. Gotina vê ya herî sivik bê însafî ye.”
Irmak axaftina xwe wiha bi dawî kir: “Kesên soza vîzeyan dabin van mirovan rayedarên fermî ji bo der barê wan de pêvajoya hiqûqî destpê bike çi ji destê me bê em ê bikin.”
Irmak ji gelê êzîdî jî xwest ku guh nedin ev şebekeyên we dixapînin, ji we pere digirin û dibêjin emê we bibin Ewropayê.
Uca: Gelê êzîdî zorî koçberiyê dikin
Mebûsa HDP'ê yê Amedê Feleknas Uca jî ji bo DÎHA'yê axivî û got: "Ev bazirganên mirovan ji welatiyên êzîdî re dibêjin 'Hûn biçin Ewropa dê we qebûl bikin. Ji bo vê yekê biçin ser sînor çalakiyê pêk bînin, dê dewleta tirk alîkariyê bide we û Ewropa dê derî li we vekin.' Me wekî HDP, DBP û KCD'ê li kampa êzîdiyan civînek hevpar pêk anî û li ser sedem û hinceta çûna Ewropa, pirsgirêk û çareseriyê hevdîtin pêk anî û me xwest vê pirsgirêkê çareser bikin."
Ûca wisa got:
- Hin kes û derdorên ji başûrê Kurdistanê û Ewropayê hatin, bazirganiya mirovan dikin. Dixwazin li ser gelê me yê êzîdî lîstikên qirêj bidin meşandin. Ev bazirganên mirovan ji welatiyên êzîdî re dibêjin "Hûn biçin Ewropa dê we qebûl bikin. Ji bo vê yekê biçin ser sînor çalakiyê pêk bînin, dê dewleta tirk alîkariyê bide we û ewropa dê derî li we vekin."
- Welatê Bulgaristanê wekî rê nîşan dane. Me têkildarî mijarê bi Sefaretxaneya Bulgaristanê re hevdîtin kir. Sefaretxaneya Bulgaristanê jî diyar kir ku agahiya "Êzîdî dê bên Bulgarîstanê" ji wan re hatiye.
- Me bi êzîdiyên ku zorî koçê hatine kirin re hevdîtin çêkir û rayedarên dewletê yên wekî Waliyê Amedê soz dane wan. Walî û qeymeqam, gotine 'em dê bi awayekî saxlem we bigînin ser sînor. Ji ber van lîstikên qirêj di nava 2 rojan de bi hezaran welatî ketine rê. Ev nîşan dide ku şebekeya qirêj di nava vî karî de heye.
- Hê gelê me li kampê bû, ajansên dewletê û hin saziyên çapemeniyê li Enqere û cihên din gotine gelê êzîdî ji bo biçin Bulgaristanê ketin rê. Em wekîlên Amedê rojek berê çûbûn kampê. Çawa agahiya me çênabe û agahiya Ajansa Anadolu çêdibe. AA çawa dîmenên li Kobanê belav kirin, manşeta têkildarî kampa êzîdiyan jî heman tişt e. AA, ev agahî ji ku stendin. Kê ev organîze kiriye. Divê vê yekê ji bo me eşkere bikin."
Her wiha Ûca got ku ew dê pêşniyarnameya der barê statuya êzîdiyên Şengalê de amade kirine jî pêşkêşî meclisê bikin.
Di vê navberê de li derdora Otogara Stenbolê hê komek êzîdiyên bi vî awayî heta Edîrne çûbûn û ji wir hatibûn vegerandin li kuçeyê bi cih bûne, li benda alîkariyê ne.