Alî Bariş Kûrt - Enqere

Mebûsê HDP'ê Sirri Sureyya Onder êrîşa li hemberî avahiya Navenda Giştî ya HDP'ê wekî 'dewama provokasyona Agirî' bi nav kir û destnîşan kir ku hikumetê ji bo êrîşê bingeh amade kiriye. Onder diyar kir ku ew ê ewlekariya xwe bi xwe bikin.

Hin kes li konaka Buklumê danê sibehê bi wesayîtekê hatin û gule bera Navenda Giştî ya HDP'ê dan. Di êrîşê de tiştek bi kesî nehat.

'KESEK JI BER XWE VE GULEYAN NAREŞÎNE'

Parlamenterê HDP'ê û Berdevkê Heyeta Îmraliyê Sirri Sureyya Onder daxuyanî da ANF'ê û got, "Îro ber destê sibehê saet di 04:00 de, bi wesayîteke spî ya plaqeya wê nayê zanîn, êrîşkarên ku bi dîtina me gelek kes bûn, gule li avahiyê reşandin. Kengî em pê hesiyan, em hatin. Polîsên nobedar ên li ber avahiyê li pişt wesayîtê bi guleyan bersiv dane. Ekîbên lêkolînkirina cihê bûyerê û hwd. encax saet di 10'an de hatin. Em jî li vir in."

Onder da xuyakirin ku êrîş dewama provokasyona Agirî ye û anî ziman ku ji bo HDP di binê bendê de were hiştin hewl tê dayîn wekî partiyeke di nava şîdetê de bê nîşandan. Onder got, "Kesek ji ber xwe ve nabêje ez rabim biçin wê derê û guleyan bireşînim."

'AKP'Ê ZEMÎN AMADE KIR'

Onder da zanîn ku hikumeta AKP'ê ji bo êrîşên li hemberî wan zemîneke cidî amade kiriye û êrîşa li hemberî HDP'ê ya li navçeya Antalya Serîkê bibîr xist û got, "Wezîfedarê hikumetê nabe ku bi êrîşkaran re bazariyê bike û tabelaya avahiyê deyne. Êrîşa li hemberî avahiya partiyê sûc e. Ya ku di vir de divê were kirin jî bazariya bi êrîşkar re nîn e. Ya ku li Serîkê rû da ev e. Em hilbijartina bihurî ji bîr nekin; tabelaya li Fethiyeyê, ji aliyê wezîfedarên dewletê ve hatibû daxistin. Ev hemû helwestên ku cesaretê didin êrîşkaran e."

Onder axaftina xwe wiha dewam kir: "Ew dixwazin dîwaran di navbera me û gel de lê bikin. Dixwazin em xwe bêparastin, di bin êrîş û gefê de bibînin û bi vî rengî bendan di navbera xwe û gel de deynin. Ev yek helwesteke ku em qebûl bikin nîn e. Em ê parastina xwe bi xwe bikin, lê belê em ê di navbera xwe û gel de dîwaran lê nekin."

HIKUMETÊ NEGOT 'DERBASBÛYÎ BE'

Sirri Sureyya Onder got, "Em ji cîranên xwe re spas dikin. Bi sedan ji wan bi pasta û çayê hatin serdana me û ji me re gotin derbasî be. Her wiha bi sedan ji wan telefon kirin, rêxistinên civakî yên sivîl dixwazin werin serdanê. Gel êdî mîna berê nakeve bin bandora van provokasyonan" û anî ziman ku rayedarên hikumetê ji bo wan negotine 'derbasî be'.