AMED

Hevserokê Giştî yê HDP'ê Selahattîn Demîrtaş li Amedê ligel partî û rêxistinên kurd hat ba hev. Demîrtaş berî hevdîtinê li ser operasyona Tirba Suleyman Şah axivî û got ku dibe li holê serfiraziya leşkerî û siyasî tune be lê PYD li vir helwesta xwe nîşan da ku di navbera Tirkiyeyê de tu dijminatiyek tune ye.

Hevserokê Giştî yê HDP'ê Selahattîn Demîrtaş ji bo hilbijartina giştî ya îsal li avahiya HDP'ya Amedê ligel partî û rêxistinên kurd hat ba hev. Di hevdîtinê de Parlamentera HDP'ê ya Qersê Mulkiye Bîrtane, Hevserokê Giştî ya DBP'ê Kamuran Yuksek, Hevserokê HDP'a Amedê Omer Onen û hîn partiyên siyasî û saziyan amade bûn. 

Ev hevdîtina Demîrtaş dê ji serê sibêya 23'yê mehê heta êvarê bidome û dê ligel komaleya DDKD, Serokê Giştî yê KADEP'ê Lutfî Baksî, Berdevkê Tevgera Azadiyê Adem Geverî, Med Zehra, OSP û nûnerên Platforma Vegera Cewherê re li ser hilbijartinê biaxive.

Berî hevdîtinê Demirtaş li ser mijara pêvajoya çareserî û operasyona Tirba Suleyman Şah sekinî.

Demîrtaş diyar kir ku çeteyên DAIŞ'ê ji bo Tirkiyeyê tehdîdêk in û wan ev mijar gelek caran aniye rojevê. Demîtaş got ku hikumet li hemberî çeteyên DAIŞ'ê heya niha neketiye nava têkoşînê û wiha dom kir: "Niha em dibînin ku DAIŞ hêdî hêdî Tirkiyeyê tehdît dike. Ez bawerim ji vir şûn de ji aliyê DAIŞ'ê ve dê tehdîdeke mezin were. Tenê li benda Tirba Suleyman Şahê jî nemînin. Dê ji her derê li hemberî Tirkiyeyê tehdîdên wan mezin bibin." 

Hevserokê HDP'ê Demîrtaş li ser venekirina korîdora ji bo Kobanî jî sekinî û got: "Di vê korîdora ji bo Tirbeya Şah Silêman de me dît ku vekirina korîdora leşkerî tiştek çawa ye. Dema çeteyên DAIŞ'ê êrîşê Kobanî kirin, di rojên pêşî de Tirkiyeyê korîdoreke vekina û ji Cizîrê alîkariya leşkerî bihata Kobanî, yanê kurdan di navbera xwe de alîkariya leşkerî bikira, wan rojên dê DAIŞ ji ser wê axê bihata qewirandin. Lê niha ev gava hatiye avêtin em wekî serketineke mezin a hikumetê nabînin. Li holê dibe ku serketineke siyasî û leşkerî jî tune be lê vê bûyerê nîşan da ku çiqas zû ji van xetayan mirov xwe bide alî, ew qas baş dibe."

Selahattin Demîrtaş diyar kir ku PYD nîşan daye ku li hemberî Tirkiyeyê helwesteke wan a neyartiyê tune ye û got ku Tirkiye divê dost û dijminên xwe baş binaze.

Wekî notek: Ji bo hilbijartina 7'ê pûşpera 2015'an ev demek e Demîrtaş li ser navê partiya xwe bi gelek derdoran re hevdîtinan didomîne û heta hilbijartinê jî dê ev hewldan bidomin. 

(Dema ev nûçe hate amadekirin hevdîtin didomiya)