Cîhan ROJ

SIPASÎ
Bi qasî berhem nivîsînê, xwendin, şîrove û nivîsên xwe ji bertekiyên xwendinê û ji rewş, qonax û afirîneriyê didin der jî muhîm in û gerek werin lê kirin. Bi vî mantiqî, ev şanzdeh sal in ji derî nivîsîna berhemên edebî min gelek nivîs lê kirin.
 Ji bo nivîskar ev hal hem dikare derfetan pêşkêş bike hem jî îhtimal e ku bibe rîsk jî. Ger wext û keda we ne bes be ev dibe sedem ku rîsk xwe bide der. Îca heya niha ji bo min ne rîsk bû lê mixabin êdî ez dibînim û têdigihijim ew hal û nivîsên gotarî dibin sedem ku ez baş li berhemên edebî sor nebim, wext terxan nekim.
Ev sê sal in, min hewl da bi awayek bi nav sohbeta xwendevanên Diyarnameyê bikevim. Îca ji vir bi şûn ve ezê nikaribim nivîsan lê bikim û bi rê bikim. Bi gotinek din, ji bo ez karibim bêtir xwe li nivisîna berheman xweş bikim xatir ji xwendevanan dixwazim.
Sipas ji bo keda  Diyarnameyê.

***

NANÊ KARTÎ Û EŞÎRATÎ
Her sibeh, sê kîlometre rê dilikume, bi saya gopalê ew heya firinê diçe,  nanên kartî dikire, bi kaş ve hildikişe. Heftê salî ye. Nanê kartî bi buhayê xwe nîve nîv e,  şêniyê malbatê zêde ye.
Em gotinên wî lê bikin:
“Du sed mihên min hebûn. Salê bi qasî du sed teneke zad min bi dest dixist. Eşîra me û eşîrek din mêr ji hev kuşt, em giş koç bûn, bela wela bûn. Li vî welatî, niha em bi hesreta loqek nan in.
Heyra heya eşîretî hebe wê halê me wiha be. Min ji eşîretiyê tu tişt fam nekiriye heyra; zilam deh baban ji min dûr e,  neheqî dike, zilm li însanan dike, ez dizanim lê wexta şer dertê ez diçim alî wî zalimî, çima, ji eşîra min e lewma, ma wiha dibe, qey ev aqil e! Tu zanî, ez wisa dibêjim lê sibeh dîsa pevçûn derê ez û kurên xwe emê dîsa xeletî bikin, em bi rastiyê dizanin lê dîsa jî qebhet dikin!”
***

Têbiniya Diyarnameyê: Her bi kêf me nivîsên nivîskarê xwe Cihan Roj weşandin. Bi vî awayî sê sal derbas bûne. Hevalê me Cihan Roj niha dixwaze hinekî ji gotaran dûr bikeve û li ser berhemên xwe yên wêjeyê bisekine. Em di hizûra xwendevanan de sipasiya nivîskarê xwe Cihan Roj dikin û dibêjin ku kengê bixwaze deriyê Diyarnameyê jêre vekiriye.

cihanacirokan@hotmail.com