AMED

Endamên Komeleya Hiqûqnasên Kurdistanê ji bo helwesta Tirkiyeyê ku piştgiriyê dide çeteyên DAIŞ'ê şermezar bikin xwestin ber bi avahiya AKP'ê ve bimeşin lê polîsan pêşî li wan girt. Li ser vê hikqûqnasan çalakiya rûniştinê dan dest pêkirin. Hiqûqnasan bang li hêzên navneteweyî kirin ku nebin şirîkê komkujiyên ku li ser kurdam tên meşandin.

Komeleya Hiqûqnasên Kurdistanê kurtedemek berê hatibû avakirin. Endamên vê komeleyê ji bo êrîşên çeteyên DAIŞ'ê şermezar bikin û destekdayîna Tirkiyeyê şermezar bikin xwestin li ber avahiya AKP'ê ya Amedê çalakiya rûniştinê pêk bînin û daxuyaniyê bidin çapemeniyê. Berî çalakiyê polîsan bi wesayîtên zirxî pêşiya AKP'ê dorpêç kirin û nehiştin kes nêzî avahiyê bibe.

Hevserokên Komeleyê Prz. Gulşen Ozbek û Serhat Eren û gelek parêzerên din ber bi AKP'ê ve meşiyan. Polîsan 200 metre nêzî avahiyê pêşî li wan girt û nehişt ew biçin ber avahiyê. Polîsan wekî rêveberên AKP'ê nîşan bidin gotin ku "Heta ku ji hundir daxwaza hevdîtinê ji me re neyê em nahêlin ku kes biçe hundir" û li ser vê axaftinê parêzeran jî bersiva "Hûn dixwazin ji me re bibêjin ku hûn xetere ne. Ji bo em bi wan re biaxivin duh me agahî ji wan re şandibû. Hûn bi tu awayî û qanînî nikarin li pêşiya me astengiyê derxînin" da.

Piştî demeke dirêj parêzeran diyar kirin ku ligel ku polîs dizanin ku di aliyê qanûnî de nikarin pêşî bigirin jî dîsa ji aliyê astengkirinê ve israr dikin. Parêzeran li ser vê yekê li çepikan da û bi berzkirina dirûşma "Bijî berxwedana Kobanî" ber bi avahiya AKP'ê ve dest bi meşê kirin. Di bêtêlên polîsan de denê anonsa "Bi tu awayî nehêlin ku derbas bibin. Bi mertalan mudaxale bikin" hat.

Serokê berê yê Baroya Amedê Mehmet Emîn Aktar li ber barîkatên polîsan li Serokê AKP'ê yê Amedê geriya û wiha got: "Ma hûn wisa mêvanên xwe pêşwazî dikin. Ez ji bo min û hempîşeyên min bêrêziyeke mezin e."

Hevserokê Komeleya Hiqûqnasên Kurdistanê Serhat Eren daxuyanî da û diyar kir ku wekî hiqûqnasan di 25'ê rezberê de bi rayedaran re hevdîtin pêk anîne û ji wan re gotine ku hikumeta AKP'ê alîkariya cebilxaneyê bi çeteyên DAIŞ'ê re dikin. Eren da zanîn ku êrîşên DAIŞ'ê li gorî hiqûqê sûcê mirovahiyê dike û wiha axivî: "Komkujiya li hemberî Kobanî li gorî hiqûqa navneteweyî sûcê mirovahiyê ye. Divê kes li hemberî vê yekê bêdeng nemîne û bêdengî şirîkatiya vî sûcî ye. Em ê şopdarê vê yekê bin." Eren bang li hêzên navneteweyî kir ku li hemberî êrîşên çeteyan bêdeng nemînin.

Piştî daxuyaniyê parêzeran 10 deqe çalakiya rûniştinê pêk anî û bi berzkirina dirûşma "Bijî berxwedana Kobanî" dawî li çalakiya xwe anîn.