AMED

KCD'ê bal kişand ser êrîşên çeteyên DAIŞ'ê yên li hember Kantona Xweser a Kobanê û got, "Bi taybetî gelên Kurdistanê em bang li her alî, kes, hêzên navneteweyî û saziyan dikin da ku li hember van çeteyên ji derve tên helwest bigirin û dengê xwe bilind bikin." 

Kongreya Civaka Demokratîk (KCD), li ser êrîşên çeteyên DAIŞ'ê yên li hember Kantona Xweser a Kobanê daxuyaniyeke nivîskî weşand. Di daxuyaniyê de hat gotin ku rejîma qedexeker a Esad û dijberên wî yên tu ferqa wan ji rejîmê nîn e Sûriye veguherandine gola "xwînê", şer û atmosfera kaotîk kûr dikin. Daxuyanî wiha didome: "Gelê kurd bi gelê ereb, suryanî û gelên din re bi pergaleke demokratîk li Rojava ava kir, erdnîgariya xwe veguherand girava îstîkrar û aştiyê. Lê belê çeteyên ji derve tên her roj êrîşên xwe dewam dikin. Bi çekên giran êrîşî Kantona Kobanê dikin." 

Di daxuyaniyê de hat gotin ku bi wan êrîşan tê xwestin ku têkiliyên di navbera kantonan de bên qutkirin û wiha hat gotin, "Bi taybetî gelên Kurdistanê em bang li her alî, kes, hêzên navneteweyî û saziyan dikin da ku li hember van çeteyên ji derve tên helwest bigirin û dengê xwe bilind bikin."