Rizoyê Xerzî

Wekî ji daxuyaniya nûnerê Neteweyên Yekbûyî El Exder El Ibrahîmî jî tê xuyakirin hevdîtinên Cenevre 2 bêencam man û Ibrahîmî lêborîna xwe ji gelê Sûriyeyê xwest ji ber ku ew nikaribûn heta niha di warê hêviyên çareseriyek siyasî û aştiyane de tu gavên berbiçav bavêjin. 

Ibrahîmî bang li aliyên hevdîtinan kir ku bêtir bi rengekî cidî ji bo çareseriyê bixebitin û got ku dê tûra sêyemîn a hevdîtinan berdewam bike bêyî ku dîrokek diyar bike. 

Wekî tê zanîn jixwe her du aliyên van hevdîtinên Cenevre 2 ji bo çareseriyê ne amade bûn û her du alî bi zexta hêzên navneteweyî  hatin ba hev. Jixwe piştî ku Rûsya û Amerîkayê li ser hin tiştan li hev kirin, Amerîkayê zext li Koalîsyona Niştimanî kir û aşkera gef lê kirin ku heke ew neçe vê civînê dê Amerîka alîkariyê ji ser wan qut bike. Ji aliyekî din ve jî Rûsyayê zext li rejîma Sûriyeyê kir ku beşdarî vê civînê bibe. Wekî ku pêşiyên kurdan dibêjin bi rastî jî wekî tajiyên ku tu bi zorê bibî nêçîrê li wan hat, lewre tajiyên ku tu bi zorê wan bibî nêçîrê tu nêçîrê nakin. 

Bi rastî dema min lêborîna El Exder Ibrahîmî bihîst, kurdên ku di nava Koalîsyonê de tevli vê civînê bûn hatin bîra min. Her wiha gotinên Abdulhekîm Beşar ên beriya destpêkirina vê civînê hatin bîra min. Beşar li ber avahiya cihê hevdîtinên Cenevreyê ji çapemeniyê re axivîbû û wiha gotibû: “Heke em mafên kurdan bi dest nexin bila gelê kurd me bi krafetên me bi dar ve bike.” 

Gelo niha ew kurdên ku yekrêziya kurdan a di Desteya Bilind a Kurd de xera kirin û bi serê xwe qedera kurdan sipartin vê Koalîsyona ku bi her awayî dijminahiya xwe ji mafên kurdan re dan xuyakirin dê çawa bi rûbarî gelê kurd bikevin? 

Gelo dê Abduhekîm Beşar û Hemîdê Hecî Derwêş jî lêborîna xwe ji gelê xwe bixwazin û li rastiya xwe mikur bên an jî ew yek ji wan re ne girîng e dîsa wê vegerin tekoşîna xwe li otêlên 5 stêrk berdewam bikin. 

Jixwe êdî eşkere bû ku hê berî lihevhatinek di navbera vê Muxalefetê û rejîma Sûriyeyê de çêbibe wan helwesta xwe ji bo mafên kurdan eşkere kirin. Heta hin kesên di nava ENKS’ê de jî vê rastiyê dibînin û êdî dibêjin em hatin xapandin. 

Kurdên ku dibêjin mirov ji nîvê rê jî vegere baş e, li gorî min li şûna israra di vê riya xwegirêdana bi Koalîsyona ku xwe nade ber tu mafên kurdan û li şûna ku hûn ji sibê heta êvarê şerê PYD, rêveberiya herêmî û Kantonan bikin, dest ji wê muxalefetê berdin û vegerin nava refên xwe. Her teyr bi refê xwe re difire. An jî bi kêmanî beriya wê wekî Ibrahîmî bikin û lêborîna xwe ji gelê kurd bixwazin.

2014-02-18, Azadiya Welat