KERKÛK
Li Kerkûkê bi amadebûna berpirsên îdarî û perwerdê, her wiha mamosta û xwendekarên zimanê kurdî festîvala ‘Destkeft û Qonaxa Nû ya ji bo Vegera li Zimanê Dayikê’ hat lidarxistin. Di festîvalê de li ser girîngiya zimanê kurdî axaftin hatin kirin.

Festîval li salona Bolîvard a Kerkûkê li dar ket. Festîvalê bi sirûda Ey Reqîb û deqeyek rêzgirtina ji bo giyanê şehîdan dest pê kir. Piştre Rêveberê Xwendina Kurdî ya Kerkûkê Mamosta Kameran axivî û got: “Em bi xwendekarên xwe yên serkeftî û destkeftiyên di warê perwerda kurdî de serbilind in. Em li vê derê mizgîniyê didin mamostayan ku wê di demek kin de zevî bi wan were dayîn.”

Piştre li ser kar û çalakiyên xwendina kurdî ya Kerkûkê sînevîzyonek hat nîşandayîn. Dûre xwendekarên dibistana dayikê derketin ser dikê û çalakiyek hunerî pêşkêş kirin.

Di çalakiyên festîvalê de li ser girîngiya zimanê kurdî hat sekinîn, du xwendekarên jin derketin ser dikê û helbest xwendin.

Di dawiya festîvalê de rêveberiya perwerda kurdî ya bajêr xelatên rêzgirtinê pêşkêşî hin mamoste û xwendekaran kirin.
Rojnews

Di festîvalê de bi sedan kes amade bûn.