Diyarname
Vê carê pirtûka helbestan a Ferhad Pîrbal hat kurmancîkirin; Pirtûka wî ya bi navê "Stranên Romantîk ên Dûrewelatiyê" ji aliyê Weşanên Pallê ve hat weşandin.
Li Bakur zêdetir roman û çirokên Ferhad Pîrbal bi kurmancî hatibûn belavkirin, niha pirtûkek wî ya helbestan hat. Rowal Navgundî ev pirtûk kiriye kurmancî û Pallê belav kiriye
Nivîskar Ferhad Pîrbal sala 1961'ê li Hewlêrê hatiye dinê. Di sala 1984'an de beşa ziman û edebiyata kurdî li Zanîngeha Silêmaniyê xelas kiriye. Sala 1986'an çûye Danîmarkayê, dûre çûye Almanyayê û herî dawî li Fransayê bi cih bûye û li vir xwendina xwe di beşa edebiyata kurdî de li Zanîngeha Sorbonneê temam kiriye. 
Pîrbalê ku sala 1994'an de vegeriyaya Başûr li Zanîngeha Selahedînê li ser dîroka edebiyata kurdî ya modern kar kiriye û navenda kulturî ya Şerefxanê Bedlîsî ava dike. 
Heta niha gelek pirtûkên wî wekî roman, şano, çîrok, helbest, lêkolîn derketine.
Hin pirtûkên wî yên bûne kurmancî ev in: Çolistan (2001, Avesta), Santiago de Compostela (2013, Avesta), Penaberekî Fransî li Kurdis-tanê (2015, Avesta), Reîs Remezan(ekan) (2015, Avesta), Evdirehîm Rehmî Hekarî (2016, Lîs).

Parçeyeke ji pirtûkê:

Te di nameya xwe de nivîsiye, dibêjî:
“Va ye em neh roj in li Wanê ne;
Polîsên tirk rê nadin em biçin bayê pak û hênik 
                    ê bajêr hilkêşin.
Hemû berêvaran bi derpêyekî xetxetî 
Di pencereyê de temaşe dikim:
Navenda Wanê, çiqas bibêjî xweş e
Çiyayên wê gerdenkeş û baxçeyên wê gelek rengîn in
Keçikên wê jî: kezîdirêj û
Bejinşorr û
Gelek nermîn in.”

Te nivîsiye, dibêjî:
“Di vê hotelê de, ne bi tenê ez im yê penaber
Em du hezar û pêncsed kes in
Polîsên tirk rê nadin em biçin bayê pak û hênik 
                    ê bajêr hilkêşin.” 
— Axir Wan jî her niştîmanê me ye
Biray şîrînim,
Wan jî 
Her niştîmanê me ye.

- Stranên Romantîk ên Dûrewelatiyê/ Ferhad Pîrbal / Weşanên Pall / Helbesçt / 104 rûpel / 2024