EKREM BEREKAT / QAMIŞLO / ANHA

Serokê Yekîtiya Nivîskarên Kurd-Sûriyê û Endamê Komîteya Amdekar ê Mîhrecana Çîorka Kurdî Dîlawerê Zengî diyar kir ku armanca wan ji mîhrîcanê vejandina çand kurdî ye û got: ˮHikmumeta Başûrê Kurdistanê bi armanca têkbirina mîhrîcanê rê ne da nivîskar û rewşenbîrên ji Başûr û Bakur derbasî Rojava bibin. Lê Mihrîcana me serkeftî hate lidarxistin, hewldarên wan têk çûn. ˮ Sekreterê Komeleya Nivîskarên Kurd a Amedê Îlhamî Sîdar jî got ku tevî hemû hewldanan wan jî PDK'ê destûr neda ew herin.

2'yemîn Mîhrîcana Çîroka Kurdî di 6’ê pûşperê de bi beşdarbûna 34 çîrokan li navenda Çand û Hunerê ya Mihemed Şêxo ya Qamişlo bi diruşmeya ˮÇîrok eynika civakê yeˮ dest pê kir. Çav li rê bû 20 nivîskar û çîroknivîs ji Başûr û Bakurê Kurdistanê beşdarî mîhrîcanê bibin. Lê rayedarên PDK’ê rê ne da nivîskar, çîroknivîs derbasî Rojava bibin û beşdarî Mîhrîcanê bibin.

Têkildarî mijarê Serokê Yekîtiya Nivîskarên Kurd-Sûriyê û Endamê Komîteya Amdekar ê Mîhrecana Çîorka Kurdî Dîlawerê Zengî diyar kir ku wan Yekîtiya Wêjevanên Kurd a Başûrê Kurdistanê ji bo beşdarbûna Mîhrîcanê ji bo beşdarî mîhrîcanê bibin dawet kir û got: ˮSerokê Yekîtiya Wêjevanên Kurd a Başûrê Kurdistanê Kak Mam Botanê kêfxweşiya xwe anî ziman û gava me avêt ji bo pêşxistina çîrok û wêjeya kurdî erênî nirxand û destnîşan kir ku dê bi 16 çîrokan ji Başûr başdarî mîhrîcanê bibin.ˮ

Zengî, da zanîn ku wan nivîskar û çîroknivîs ji bakurê Kurdistanê jî vexwendin mîhrîcanê û wiha dom kir: ˮJI Bakur jî 3 nivîskar hatibûn vexwedin. Nivîskaran gotibûn ku piştî hilbijartinên 7’ê pûşperê bi dawî bibin, dê berê xwe bidin Rojava.ˮ

Zengî da xuyakirin ku di roja duyemîn a Mîhrecanê de Yekîtiya Wêjevanên Başûrê Kurdistanê peyam ji wan re şand û wan agahdar kir ku rayedarên başûrê Kurdistanê rê nedan wan ku derbasî Rojava bibin û wiha dom kir: ˮDi heman demê de nivîskarên ji Bakur jî telefonî me kirin û gotin ku rayedarên başûrê Kurdistanê bê ku tu sedeman nîşan bidin rê nedane wan ku derbasî Rojava bibin.ˮ

Zengî, destnîşan kir ku nivîskarên ji başûrê Kurdistanê ên wekî Hemê Arif Emîn, Celadet Zengbadî û Serokê Yekîtiya Wêjevanên Kurd ên Başûrê Kurdistanê Kak Mam Botanî telefonî wan kirin û derbarê hilwesta hikumeta Başûrê Kurdistanê nerazîbûna xwe anîn ziman.ˮ

‘Armanca me vejandina çanda kurdiye’

Zengî da zanîn ku armanca wan ji Mîhrîcanê ev e ku çanda kurdî vejînin û wiha dom kir: ˮMîhrîcana me ne siyasî yan leşkerî ye û ne jî hizbî ye. Mîhrîcana me bi armanca vejandina çanda kurdî û pêşxistina wê ye. Rayedarên Başûr bi qedexekirina derbasbûna nivîskarên ji parçeyên din ên Kurdistanê li dijî armancên me tevdigere.ˮ

‘Rayedarên Başûr xwestin mîhrecana me têk bibin’

Di dawiya axaftina xwe de Dîlawerê Zengî helwseta Hikumeta Başûrê Kurdistanê rexne kir û ev tişt anî ziman: ˮArmanca sereke ya rayedarên Başûrê Kurdistanê ku ne hiştin nivîksarên ji Bakur û Başûr derbasî Roajva bibin, têkbirina Mîhrîcana Çîroka Kurdî ye. Mîhrîcana me mîhrîcaneke civakî û çandî ye. Me mîhrîcan lidar xist, em ji wan re dibêjin ku mîhrîcana me bi ser ket û hewldanên rayedarên başûrê Kurdistanê têk çûn.ˮ

Sîdar: ‘Kiryarên PDK’ê li dijî exlaqên kurdayetiyê ne’

Her wiha li ser destûrnedana hikumeta Başûr, Sekretêrê Komeleya Nivîskarên Kurd a Amedê Îlhamî Sîdar di riya telefonê ji bo ANHA’yê got mu nivîskarên kurd ji bakurê Kurdistanê ji bo mîhrîcan bi serkeve tişta ket ser milên wan pêk anîn û bi kêfxweşî bi çîrokên xwe beşdarbûna xwe nîşan dan. Sînor derbas kirin û berê xwe dan başûrê Kurdistanê. Tirkiyeyê rê li ber nivîksarên me negirt, lê mixabin li deriyê Sînor ê Sêmalka rayedarên PDK’ê destûr neda ku derbas bibin. Tevî hemû hewldanan jî destûr nehat dayîn.ˮ

Sîdar, da zanîn ku pişî nivîskarên Bakur vegeriyan hewl dan ku di deriyê Nisêbînê re derbasî Qamişlo bibin û ev tişt anî ziman: ˮLê mixabin li vir jî rayedarên Tirkiyê rê nedan ku nivîskar derbas bibin.ˮ

Li ser pirs sedema qedexekirinê Îlhamî Sîdar got: ˮEm nizan çima wisa kirin û destûr nedan. Em wekî Komeleya Nivîskaran nêzîkariyên rayedarên PDK’ê şermezar dikin, em îzahkirina vê yekê dixwazin. Em ne siyasetmedar in, em nivîksar û rewşnbîr in. Nêzîkatiya wan ne însanî û dûrî hemû nirxên biratî û kurdayetiyê ye.ˮ

Sîdar destnîşan kir ku dema behsa Kongreya Netewî tê kirin  rayedarên PDK’ê nahêlin nivîskar derbasî Rojava bibin û got: ˮGelo çima wisa dikin, ev li dijî berjewndiya gelê kurd e, ev ne çanda me kurda ye. Ev ne cara yekem e ku PDK  kiryarên bi vî rengî dike. Di sala 2013’yan de jî rayedarên PDK’ê nehiştin ez derbasî Rojava bibim. Wê demê fermandarekî wan bi navê Şewket Berwarî got tu derbas nabe.ˮ

Di dawiya axaftina xwe de Sekreterê Giştî yê Komeleya Nivîskarên Bakurê Kurdistanê Ilhamî Sîdar nerazîbûnn xwe anî ziman û serkeftin ji Mîhrîcana Kurdî re xwest û bi vê hevokê dawî li axaftinên xwe anî: "Ez berxwedana Rojava silav dikim.ˮ