Diyarname
Nûçe li ku derbas dibe ne muhîm e, tiştê muhîm li cihek li ser rûyê dinyayê, qewmekî radibe dixwaze li ser zimanê xwe mîtîngek çêbike, ew mîtîng tê qedexe kirin. Erê em dizanin destpêka nûçeyê divê ne wisa be, nûçe divê wisa dest pê neke lê rastî ev e: Li cihek biçûk, li ser rûyê dinyayê mîtîngeke ziman tê qedexe kirin. Yên ku ji bo zimanekî ev mîtîng amade kirine ji îro pêde dê çi bikin? Yên ku dê û bavên wan, kal û pîrên wan, em û eşîrên wan heta niha bi vî zimanî xeber dane dê çi bikin? Belê mîtîngê zimanî hatiye qedexekirin.
Em niha nûçeyê bidin:
Tora Ziman û Çanda Kurdî û Platforma Ziwan 22'yê reşemiya îsal bi sedema "Zimanê Kurdî Bibe Zimanê Fermî û Zimanê Perwerdehiyê" kampanyaya ziman dabû dest pê kirin. Niha jî biryar dabûn ku li 3 bajaran mîtîngên ziman li dar bixin. Li gor bernameyê 3'yê mehê li Cizîrê, 4'ê mehê li Wanê û 7'ê mehê dê li Amedê li dar biketa. 3'yê mehê mîtînga li Cizîrê hat qedexekirin.
Gel jî li ber avahiya HDP'ya Cizîra Şirnexê hat ba hev, daxuyanî da çapeminiyê û li wir daxwaza xwe anî ziman.
Hevseroka DBP'ê Saliha Aydeniz, Serokê KKP'ê Sinan Çiftyurek, Berdevkê Platforam Zimanê Kurdî Şerefxan Cîzîrî, mebûsên HDP'ê yên Mêrdîn û Amedê, Hevserokê Komeleya Ziman û Çandê ya Birca Belek Mîrza Ronî û gelek kes beşdarî civîna daxuyaniyê bûn.
Pêşî Hevserokê Komeleya Ziman û Çandê ya Birca Belek Mîrza Ronî axivî, silav li beşdarên heyî kir û qedexekirina mîtîngê şermezar kir.
Dûre Hevseroka DBP'ê Aydenîz jî axivî û got: "Gelê kurd û zimanê kurdî bi êrîş, bişaftin, kuştin, tunekirin û qedexekirinan naqede. Ji ber wê jî pêwîst e ziman û nasnameya gelê kurd bê naskirin. Heta ziman û nasnameya me bê naskirin em ê têkoşîna xwe mezin bikin. Em dibêjin divê zimanê kurdî bibe zimanê fermî û perwerdehiyê. Dayikên me ji bo zimanê kurdî winda nebe xwedî derketin û heta vê rojê anîn. Em destûrê nedin ku polîtîkayên bişaftin û qedexeyê bikeve mala me. Em ê bi hev re ji bo zimanê xwe têkoşîna xwe mezin bikin. Em têkoşîna Botanê ji Mem û Zînê dizanin. Em jî evîndarên zimanê xwe ne. Heta zimanê kurdî bibe zimanê perwerdehiyê em ê têkoşîna xwe bidomînin.”
Dûre beşdarên din jî li ser ziman axivîn. Piştî axaftinan girseyê dîrûşmeya “Bê ziman jiyan nabe” berz kir û dest bi bi gerandina govendê kirin..