Diyarname
Di nav korîdorên mirinê yên Girtîgeha Amedê de bi dehan kesî jiyana xwe ji dest da, bi hezaran kesî înkence hat kirin. Li ser vê girtîgehê gelek pirtûk hatin nivîsandin, belgefîlm hatin kişandin. Niha pirtûkek din li van pirtûkan hat zêdekirin. Pirtûka bi navê "Ölüm Koridoru / Diyarbakir Cezaevi’nden Notlar / Hamit Kankiliç ile soyleşi” (Korîdora Mirinê / Notên Girtîgeha Amedê / Gotûbêja bi Hamit Kankiliç re) ji Weşanên Avestayê derket. Parêzer û rewşenbîrê kurd Firat Aydinkaya bi Kankiliç re gotûbej kiriye û pirtûk amade kiriye.

Aydinkaya li ser amadekirina pirtûkê wiha dibêje: Wijdanên ku li hemberî îşkenceyê disekinin kêm bûne, ji bo ev wijdan xurtir bibin ev gav hatiye avêtin. Tiştê ku îşkenceyê têk bibe ne siyaset e. Dibe ku tekane tiştê îşkenceyê têk bibe wijdan e. Ev pirtûk ji bo balkişandina ser wijdanan hatiye amadekirin.

Hamit Kankiliç karekterê sereke yê çîrokê ye. Ew kesek e ku di dema Derbeya 12'yê Rezberê de li Girtîgeha Amedê maye, bûye şahidê hemû kîteyên ku li wê derê hatine jiyîn û niha jî ew van kîteyan bi rêya Aydinkaya, di vê pirtûkê de careke din tîne ziman.
Kankiliç ji bo wê trajediyê ji ser xwe bavêje hê jî têkoşîna xwe dide. Daxwaza wî ya herî mezin jî ew e ku ew navenda wehşetê, Girtîgeha Amedê bibe muze.
Di pirtûka ku ji Avestayê derketiye de kîteyên wê serdemê careke din derdikeve pêşberî wijdanan, derdikevin pêşberî xwendevanan.

Olum Koridoru / Diyarbakir Cezaevi’nden Notlar / Hamit Kankiliç ile soyleşi / Firat Aydınkaya / 208  rûpel