AMED
Şaredar, Serokên Meclisên Giştî yên Bajaran û endamên meclisên bajar û şaredariyan li Salona Navenda Çanda Ciwanan a Cegerxwîn kom bûn û ji bo çareseriya pirsgirêka kurd 7 xalên çareseriyê pêşkêş kirin.
Wan xwest şert û mercên Abdullah Ocalan bên başkirin, Konseya Aştiyê, Konseya Zagona Bingehîn a nû û Komîsyona Lêkolîn û Lêgerîna Heqîqetê bê avakirin. Girtiyên ji doza KCK'ê serbest bên berdan. Her wiha ji KCD'ê (Kongreya Civaka Demokratîk) jî xwestin Xweseriya Demokratîk îlan bikin.

Şaredar, Serokên Meclisên Giştî yên Bajaran, endamên Meclis û Şaredaran yên BDP'yî li Salona Navenda Çanda Ciwanan a Cegerxwîn kom bûn û ji bo pirsgirêka kurd çareser bibe daxuyanî dan.

Di civînê de 101 Şaredar, 10 Serokên Meclisa Giştî yên Bajaran û endamên meclisan amade bûn. Li ser navê şaredar û serokan Şaredarê Wanê Bekîr Kaya daxuyanî xwend. Kaya, diyar kir ku Eniya Ked, Demokrasî û Azadiyê li gel hemû zext, zordarî û astengiyan di hilbijartina 12'ê pûşperê de serekftinek mezin bi dest xistiye.

Kaya, anî ziman ku ev serkeftina gelê kurd a têkoşîna salan e û wiha got: "Pergala li ser polîtîkayên înkar û îmhayê yên di salên 1990'an de hatine avakirin îro îflas kiriye. Ev serkeftina Eniyê ji bo pêşketina û demokratîkbûna Tirkiyeyê firsetek gelek mezin e. Hem ji bo Yekîtiya Neteweya Kurdan û hem jî ji bo yekîtiya gelê kurd û tirk rê li ber pêşerojek nû vekiriye. Ew dixwazin dîsa Kurd serî li ber wan bitewînin. Lê gelê kurd êdî bi tecrube û serpêhatiyên xwe dersên dîrokî girtine û êdî dê heta dawî ji bo azadiya xwe têbikoşe."

Kaya diyar kir ku di hilbijartinên 2011'an de jiyana bê statu û bê nasname red kirine û wiha berdawm kir: "Ji ber vê yekê jî hilbijartineke ne ji rêzê bû. Di hilbijartinê de kurdan riya di welatê demokratîk de, bi awayeke xweser bi hev re jiyan hilbijart. Ji ber vê yekê jî tenê wekî hilbijartina çend parlamenteran zêde an jî kêm neyê dîtin. Divê ev sekna kurdan a li dijî înkar û redkirinê wekî sekneke bi rûmet bê dîtin. Divê ey yek bihata qebûlkirin lê careke din ji aliyê Zagona Bingehîn a faşîst a 12'ê Rezberê ve hate astengkirin."

Kaya da zanîn ku piştî hilbijartinan wekî tehamulnekirineke piştî hilbijartinên herêmî ya 29'ê Adarê derket holê û wiha axivî: "Kurdan xwestin nûnerên xwe yên siyasî bişînin meclisê. Lê ev yek hate astengkirin. Hemû parlamenterên Blokê jî li dijî vê yekê helwesteke bi rûmet nîşan dan û neçûn meclisê û ev biryar jî bi raya giştî re parve kirin. Em jî vê biryarê bi rêzdarî pêşwazî dikin em ê li cem vê biryarê bin. Heta ku daxwazên gelê me yên rewa bêne bicihanîn em ê di têkoşÎna siyasî ya demokratîk de cihê xwe bigirin. Ji ber vê yekê jî berî ku meclis bikeve betlaneyê îrade û hêza çareseriyê nîşan bide."

JI SEROKÊN BDP'EY'î 7 PÊŞNIYAR

Kaya pêşniyarên ji bo çareseriya pirsgirêka kurd wiha rêz kir:

* Baweriya me ew e ku hevdîtinên bi Birêz Ocalan re têne kirin û ji raya giştî ya demokratîk de nikare bê veşartin bi watedar in û dê ji bo çareseriyê bibe piştgiriyeke mezin. Ji ber vê yekê jî divê şert û mercên Ocalan bêne başkirin û di diyalog û muzakereyê de ji bo rola ku bikaribe bilîze derfet bêne avakirin.

* Konseya Aştiyê, Konseya Zagona Bingehên û Komîsyona Lêkolînkirina heqîqetan ji aliyê meclisê ve bê avakirin û ji bo vê yekê biryar bê girtin.

* Divê dozên KCK'ê bêne betalkirin û hemû girtî bêne berdan.

* Divê meclisê Zagoneke Bingehîn a demokratîk, azadîxwaz a zayendî û wekhev bixe rojevê.

* TMK; CMK, qanûna hilbijartin û partiyên siyasî divê bêne rakirin.

* Xweseriya Demokratîk divê li Tirkiyeyê pêk bê.

* Divê KCD bi rojeva ku di warê siyasî, civakî, ekolojîk, çandî û aborî de Xweseriya Demokratîk nîqaş bike bi awayeke awarte bicive.

Ji DÎHA'yê hatiye girtin