Diyarname
Rewşenbîrên kurd kuştina rojnameger Serdeşt Osman ku li Hewlêrê ji ber zanîngehê hat revandin û li Misûlê kuştî hat dîtin, şermezar dikin. Rewşenbîrên kurd ji bo vê yekê metneke îmzeyan amade kir û îmzeya xwe avêt bin metnê. Di metnê de dibêjin: “Em bala hikumeta Kurdistana Başûr dikişînin ser narewayiya ev cure kiryaran ku li beşekî welatê me yê azad rû didin.”
Rewşenbîran di daxuyaniya xwe de gotin; “Bêguman gelê kurd di riya azadiyê de û ji bo ku xwe bigihîne asta gelên cîhanê yên ku di nav azadiyê de dijîn, bi hezaran şehîd dane û didin” û wisa dom kirin: “Em zilma dagirkeran têdigihên lê belê di bin rêveberiya kurdan bi xwe de bi tu rûyî nabe ku bersiva nivîsekê guleyekî kor be, bersiva dîtineke cuda zindan be, bersiva hubrê herikandina xwînê be û bersiva ramanê teqîna tivingê be. Bila baş bihê zanîn ku bi kuştina Serdeşt Osmanî re hemî rojnameger, nivîskar, edîb û ramanbêjên kurdan hatine kuştin! Bi şikandina qelemeke azad re qelemên me hemûyan hatin şikandin. Bi birîna zimanekî re tê xwestin ku zimanê me hemûyan were birîn!”
Rewşenbîran gotin ku ev bi tu awayî nayê pejirandin û got: “Gunehkarî çiqasî mezin be, dadgeh hene, zagon û yasa hene û divê tenê li wir ceza werin birîn. Sûc çi dibe bila bibe, nabe ku kuştina ku ji çanda daristanên hov hatiye bibe metoda çareserkirina nakokiyan.”
Di metnê de hate gotin ku gelê me ne ji bo ku ji bin siya tirsekê derkeve û têkeve bin siya tirseke din bi sedê salan têkoşîyan. Ne ji bo ku zindanekê bi yeke dî re biguhere xwîna xwe li serê çiyan, li newalan û di kolanan de rijandiye.
Di dawiya metna xwe de rewşenbîran wisa got: “Em her ji gelê xwe re rûyê azadiyê yê şêrîn derdixin ber çavan, lê bi vî awayî dilê gel ji azadiyê jî sar dibe. Eger azadiya welatekî ne girêdayî azadiya takekesên wî welatî be, ew rengekî nû ye ji koletiyeke din. Kesên ku navê me li jêr nivîsandî ye, em bi diltengî daxwaz ji karbidestên hikumeta Kurdîstana Başûr dikin ku di zûtirîn demê de berpirsîyarên vê kiryara hov derxin pêş dadgeha edaletê.”
Kesên ku şanenava xwe avêtiye bin metnê ev in:
Ali Fikri Işik, Cuma Ozusan, Ezîz Xemcivîn, Hesen Çakir, Îbrahîm Seydo Aydogan, Înayet Dîko, Jan Dost, Mîrê Hêkan, Mîrhem Yigit, Muhsin Kizilkaya, Miço Kendeş, Paşa Birodirêj, Roşan Lezgîn, Tosinê Reşîd, Vecdî Erbay, Wehdet Sîwanij, Weysî Ayaz, Xelat Ehmed, Yaqob Tilermenî, Zana Farqînî.
***
Nûçeya eleqedar:
- Agahiyên li ser rojrameger Serdeşt Osman ê hat kuştin