Di 23'yê mehê de jî li gelek bajaran Newroz hat pîrozkirin. Piştî Wanê li Geverê jî şehîdek çêbû.
Stenbol
Qada Kazliçeşmeya Stenbolê têrî gel nekir. Li dor 250 hezar kes li Qada Qazliçeşmeyê hat cem hev û Newroza xwe bi rengên xwe, bi stranên xwe pîroz kir. Di Newrozê de mebûsên DTP'ê Emine Ayna, Sirri Sakik û Sebahat Tuncel axaftin kirin, rexne li desthilatdariyê kirin.
Newroz bê bûyer bi dawî bû, lê piştî Newrozê leşker li ben deriyê Çarşiya Bakirkoy bi diruşmên "Her tişt ji bo welat e" meşiyan
Li Geverê İkbal Yaşar hat şehîdkirin
Li Gevera Culemêrgê serê sibê mebûsê Culemêrgê Hamit Geylani jî di nav de 15 hezar kes li ber avahiya DTP'ê hat cem hev û xwest Newrozê pîroz bike. Polîsan destûr neda û êrîşê gel kir. Li ser vê yekê ciwanan jî bersiv da. Di pevçûnan de çend kes bi guleyên polîsan birîndar bûn. Çalakvan Îkbal Yaşar ku gule li singê wî ket rakirin nexweşxaneyê lê di rêde jiyana xwe ji dest da. Tê gotin ku Selim Akbaş, Raif İren û Savaş Babalitaş bi giranî birîndar in.
Li Culemêrgê ji ber şermezarkirina bûyerên li Wan û Geverê nîvrokî esnafan dikanên xwe girtin.
Her wiha li Geverê li taxa Esentepe teqîneke pêk hat û sê polîs birîndar bûn.
Îzmîr
Li Îzmîrê Walîtî destûr neda pîrozbahiya Newrozê. Digel vê yekê DTP'yiyan xwest li Meydana Gundogdu Newrozê pîroz bikin. Ji bo vê yekê li ber avahiya DTP'ê hatin cem hev lê polîsan êrîş kir. Bi hezaran kes ku xwestin ber bi qadê ve bimeşin pêşî li wan hate girtin. Mebûsê DTP'ê Akin Bîrdal xwest ewlehî ji pêşiya gel helî û gel here qada Newrozê lê destûr nehate dayîn û pevçûn derket.
Konya
Li konyayê 9 kesên ku di Newrozê de ji ber qîrîna diruşmeyan hatibûn binçavkirin derxistin dadgehê. Ji van 9 kesan 5 kes hatin tewqîfkirin û ew şandin girtîgehê.
Denizli
Li Denîzliyê li Meydana Pazaryerî ya li Taxa Esenpe Newroz hate pîrozkirin. Gel bi gerandina govendê û qîrandina diruşman Newroza xwe pîroz kir, lê li Denizliyê jî binçavkirin hebûn. 5 kes hatin binçavkirin.
Bursa
Pîrozbahiya Newrozê ya ku bi organîzeya DTP, EMEP, SDP, ESP, SODAP, Partîzan û hind rêxistinên sivîl ve li Bulvara Gokdereyê hate lidarxistin bi coş derbas bû. Nêzî 5 hezar kesên beşdarî pîrozbahiyê bûn yek bi yek di noqteya lêgerînê de hatin derbaskirin.
Enqere
Li Enqereyê bi pêşengiya DTP, EMEP, SDP, ODP, Mala Gel, ESP, Komeleya Pîr Sultan Abdal, sendîka û hind komeleyan pîrozbahiya Newrozê hate lidarxistin. Girseya ku li Kolana Torosê hate cem hev heta parka Abdî Îpekçî meşiya. Nêzî 5 hezar kesên ku beşdarî pîrozbahiya Newrozê bûn, di noqteyên lêgerînê de derbas bûn.
Li ser pirsa Parlamenterê DTP'ê ya Şirnaxê Hasîp Kaplan a "Hûn dixwazin ku Newroz bibe pîrozbahiya fermî?" girseyê bi yek dengî bersiva 'erê' da. Kaplan, di axaftina xwe de bang li Erdogan kir û wiha dom kir: "Birêz Erdogan tu vî dengî dibihîzî an na? Lê gelê Amedê bersiva AKP'ê da. Her wiha ji êrîşên li hemberî gelê Colemêrg, Wan û Sêrtê jî hikûmet berpirsiyare. Li Wanê jinên ku bi cîlên xwe yên neteweyî xwestin Newrozê pîroz bikin rastê êrîşa bi cop hatin. Copên ku li hemberî jinên kurd haten bikaranîn li hemberî rûmeta kurdan hatine bikaranîn. AKP'ê bi ser gel de gule barandin. Erdogan pêvçûna kurd û tirkan kûr dike."
Piştî axaftinan hunermend Cevahîr Canpolat û koma Rizgar ya NÇM'aStenbolê konser dan.
Balikesir
Waliyê Balikesîrê bi hinceta "wê bibe sedema qirêjiya derdorê" ji bo pîrozbahiyên Newrozê destûr nedabû. Lê li gel vê yekê jî Newroz li qadan hate pîrozkirin. Wesayîtên bi sedan kesên ku ji Edremît, Burhaniye û Altinolukê ji bo beşdarî pîrozbahiya Newrozê ya li Taxa Çamtepe ya Ayvalik bibin derketin rê, hatin sekinandin û bi hinceta kontrola nasnameyan bi saetan hatin rawestandin. Girseya ku piştî kontrola nasnameyan gihîşt qada Newrozê, li Ayvalikê bi çepik û sloganan hate pêşwazîkirin. Li gel hişyariya polîsan a "heke hûn belav nebin ji ber xwepêşandana bêdestûr em dê mudaxele bikin" jî girseyê qada Newrozê terk nekir. Nêzî hezar kesên ku beşdarî pîrozbahiyê bûn diruşm avêtin û govend gerandin
Nêzî 500 kesên ku li ber Mizgefta Yuzuncu Yil a Navçeya Bandirma ya Balikesîrê hatin cem hev jî, agir vêxist û Newroz pîroz kir
Edene
Newroza Edeneyê bi beşdariya dehezaran li dar ket. Parlementera DTP'ê ya Amedê Gultan Kişanak, Endamê Meclîsa DTP'ê Mustafa Avci di pîrozbahiyê de axaftin kirin.
Kişanak, diyar kir ku divê hikûmeta AKP'ê ji bo polîtîkayên xwe yên li ser kurdan lêborînê ji gelê kurd bixwaze û wiha berdewam kir: "Ji ber polîtîkayên AKP'ê êrîşên li ser partiya me û gelê kurd zêde bûne. Li Wanê Mehmet Denîz, li Şirnexê Yahya Menekşe kuştin. Gelê kurd van kuştinan bê bersîev nahêle. Divê hikûmeta AKP'ê dest ji polîtîkayên şîdet û şer berde."
Piştî axaftinan pîrozbahî bi stranên Koroya Zarokan a Newayên Ro, Koma Dengê Ezgî û Koma Çiya didome.
Wan
HAK-PAR'ê jî li Wanê pîrozbahiyeke bi xwarin a Newrozê li Hotela Akdamar li dar xist.