Edene
Nuçegîhanê DÎHA'yê Volkan Eryîgît di 4'emîn salvegera wî de li Edeneyê hat bbîranîn.

Ergiyit ku di 19'ê adara 2004'an de dema konvoya Yekîtiya Hêza Demokratîk dişopand, di qezaya trafîkê de jiyana xwe ji dest da bû. Eryigit, ji aliyê xebatkarên çapemeniya azad û malbata wî ve hate bibîranîn.

Di 4'emîn salvegera mirina Eryigit de li mala malbata wî ya li Taxa Denîzliyê mewlûd hate dayîn. Xebatkarên çapemeniya azad, Serokê Rêxistina DTP'ê ya Bajêr Zekî Karataş, Şaredara Kuçukdîkiliyê Leyla Guven, Şaredarê Yakapinarê Osman Keser ku ji peywirê hatibû girtin û nêzî 200 kes tevlî mewlûdê bûn. Piştî ku mewlûd hate xwendin bavê Eryîgît Aydin Eryîgît axivî û diyar kir ku Volkan şehîdê demokrasiyê ye û ewê wî her tim bibîr bînin. Xebatkarê Azadiya Welat Alî Kalîk ku li ser navê xebatkarên çapemeniya azad û hevalên Eryîgît axivî, diyar kir Volkan ji bo ku rastiyan ji gel re ragihîne hewl dida û ji ber vê fedakariya xwe jiyana xwe ji dest da.

Kalîk, destnîşan kir ku Volkan û hevalên wî yên xebatê riya Apê Mûsa dişopînin û wiha got: "Xebatkarên çapemeniya azad her tim bedela ragihandina rastiyan dane. Duh nuçegîhanên DÎHA'yê Alî Buluş, Mehmet Karaaslan û xebatkarê Gundemê Bayram Parlak ev bedel bi cezayê girtîgehê dan. Lê belê li gel van bedelan jî emê têkoşîna ku Apê Mûsayan daye destpêkirin û Volkanan wan berdewam kir, heta bigihîje armanca xwe bidomînin."