Diyarname

Hikumeta AKP'ê li ser zagoneke nû dixebite ku li gor zagonê şaredarek kurd ku ji kar bê girtin dê ji dêvla wî/ê ve hikumet bixwe yekî terxan bike.

Hewldanên Hikumeta AKP'ê yên li hemberî kurdan ranawestin. Di nûçeya Nevin Bilgin a di rojnameya Starê ku nêzî hikumetê ye de Cîgirê Serokê Giştî yê AKP'ê yê ji Rêveberiyên Herêmî Berpirs Mehmet Ozhasekî gotiye ew niha li ser zagoneke nû dixebitin ku ev zagon berî meclis bikeve tatîlê dê derkeve. 

Ozhasekî gotiye şaredarên HDP-DBP'ê dema ji kar bêne girtin dê di zagone de pêşniyar bikin ku ji dêvla wan hikumet bixwe yekî bike berpirsiyar. Li gor zagona niha dema şaredarek ji kar tê girtin ji nav Meclisa Şaredariyê kesek din tê hilbijartin, li bajarên kurdan ji ber piraniya Meclisa Şaredariyê jî di destê HDPDBP'ê de ye, hikumet dixwaze vê rayeyê jî ji holê rake.

Ozhasekî wisa gotiye: "Bi makîneyên xebatê yên şaredariyê xendekan dikolin. Gere li hemberî vê tevdîr bê girtin. Emê bi hevalên xwe yên li CHP û MHP'ê re biaxivin. Armanca me ew e şaredarî xizmetê baş bike."

Rayeya Şaredariyên Mezin bi paş ve tê girtin

Li aliyê din di rojnameya Tarafê Huseyîn Ozay nivîsî ku hikumet dixwaze heta dawiya mehê zagonek nû derxe, li gor vê zagonê rayeya Şaredariyên Bajarên Mezin ji şaredariyan bigire wekî berê vê rayeyê dîsa bide waliyan. Zagona Şaredariyên Bajarên Mezin sê sal berê ghuerî bû û gelek peywir ketibû ser milên şaredariyan. Li gor zagona sê sal berê şaredar bêyî destûrê ji walî bigirin nikaribûn mîxek jî li cihek bixin. Li gor nûçeyê Hikumeta AKP'ê niha dixwaze heman zagonê bi paş ve bîne.