Şeveke din a Oscarê li dar ket, saleke din fîlm gihîştin Oscarên xwe. Û gotinên di şevê de hatin kirin reng da şevê. Di şeva ku pêşkêşvaniya wê Neil Patrick Harris kir de fîlmê "Birdman" (Çivîkzilam) wekî Fîlmê Herî Serketî hal hilbijartin. Derhênerê fîlm ji Meksîkayê Alejandro Gonzalez Inarritu ye û par jî ji Meksîkayê derhêner Alfonso Cuaron "Gravity" girtibû. Inarritu bal kişand ser Cuaron û bi henek got: "Du sal in ser hev de meksîkayî. Di vê de şikek heye." 

Alejandro Gonzalez Inarritu yê derhênerê "Birdman" di warê Fîlmê Herî Serketî, Derhênerê Herî Serketî, Derhênerê Dîmenê yê Herî Serketî, Senaryoya Orjînal a Herî Serketî di 4 waran de xelat girt.

Ji bo pêşkêşkirina Xelata Fîlmê Herî Serketî lîstikvan Sean Penn derket ser dikê û Inarritu vexwend ser dikê, pêre jî bi ken got: "Kî paseportê kesk da vê kurê qehpê ku were vir?" Gotina Penn henek be jî li qada tora civakî bû sedema nîqaşan.

Lîstikvan Julianne Moore di warê Lîstikvana Herî Serketî de xelata Oscarê girt û di axaftina xwe de got: "Dibêjin yên Oscarê bigirin pênc salan temenê wî/ê dirêj dibe. Ger bi rastî jî wisa be ez gelek sipas dikim ji ber ku mêrê min ji min ciwantir e."

Eddie Redmayne ku rola Stephen Hawkind girtibû ser milên xwe Xelata Lîstikvanê Herî Serketî girt.

Di 87'emîn merasima xelatdayîna Oscaran de 8 fîlm ji bo Fîlmê Herî Serketî ketibûn pêşbaziyê ji vê pêşbaziyê "Birdman" bi serketî derket. Her wiha fîlmên "Birdman" û "The Grand Budapest Hotel" her yek di 9 waran de bûbûn berendam lê Birdman bi ser ket. Wekî "Birdman" fîlmê "The Grand Budapest Hotel" jî 4 xelat girtin lê xelatên wê bi qasî yên Birdman ne mezin bûn.

Her wiha li bendê bûn ku fîlmê "Zarokatî" ku di 12 salan de hatiye kişandin hin encamên baş bi dest bixe lê tenê di warê Lîstikvana Duyemîn a Herî Serketî de fîlm hat xelatkirin.

Vane xelatên ku di şevê de hatin belavkirin:

Fîlmê Herî Serketî: Birdman

Derhênere Herî Serketî:  Alejandro González Iñárritu (Birdman)

Lîstikvana Herî Serketî:  Julianne Moore (bi rola di Still Alice de)

Lîstikvanê Herî Serketî:  Eddie Redmayne (Teoriya Her Tiştî Heye)

Lîstikvana Duyemîn a Herî Serketî:  Patricia Arquette (Bi rola di Zarokatî de)

Lîstikvanê Duyemîn ê Herî Serketî:  J. K. Simmons (bi rola di Whiplash de)

Senaryoya Xweser a Herî Serketî:  Alejandro G. Iñárritu, Nicolás Giacobone, Alexander Dinelaris, Armando Bo (Birdman)

Senaryoya Lêanînê ya Herî Serketî:  Graham Moore (The Imitation Game)

Fîlmê Herî Seketî yê bi Zimanê Biyanî Ida (Derhêner Pawel Pawlikowski / Polonya)

Anîmasyonê Herî Serketî: "Big Hero 6"

Belgefîlmê Herî Serketî: CitizenFour

Muzika Herî Serketî:  "Glory," from "Selma"

Kincên Herî Serketî: The Grand Budapest Hotel