Diyarname

Komisyona Ziman û Perwerdeyê ya KNK'ê (Kongreya Neteweyî ya Kurdistanê) bi daxuyaniyeke nivîskî Cejna Zimanê Kurdî pîroz kir.

KNK'ê di daxuyaniya xwe de got ku wekî tête zanîn, ji alîyê KNK'ê ve 14-15-16'ê Gulanê wekî rojên Cejna Zimanê Kurdî hatine qebûl û îlan kirin ku ji 2007'an ve li temamî Kurdistanê û dîasporayê tê pîroz kirin. Daxuyaniya KNK'ê wisa dom kir: "Di nav van sê rojan da bi taybetî 15'ê Gulanê ji ber ku roja weşana kovara Hawarê ye ku Mîr Celadet û Mîr Kamuran Bedir Xan li 1932'yan li Şamê weşandibûn. Hawarê xizmeteke mezin ji bo zimanê kurdî kirîye, lewma hêja ye ku di van sê rojên Cejna Zimanê Kurdî de 15'ê Gulanê bi taybetî wekî Cejna Zimanê Kurdî bê pîroz kirin."

Daxuyanî dibêje isal jî wekî her car hêviya KNK-KZP'ê ew e ku Cejna Zimanê Kurdî bi coş û heyecaneke mezin bê pîroz kirin û wiha didome: "Zimanê kurdî zimanekî berxwedêr e, serê xwe li ber hemû reng asîmîlasyon û jenosîda kulturî ya dagîrkeran şor nekirîye, xwe sax û jînde hêlaye. Îro zimanê kurdî bi avabûnên başûra Kurdistanê [Kurdistana Federal] û rojavaya Kurdistanê [Kurdistana Kantonal] bûye zimanê fermîyetê, perwerdeyê û hemû jîyanê. Eve serkeftina zimanê kurdî ye. Li bakura Kurdistanê û rojhilata Kurdistanê jî berxwedan û têkoşîna bi kar înana zimanê kurdî ya di warê fermîyet û perwerdeyê da bi xurtî didome. Di nav van şert û mercan da em bawer dikin ku li Kurdistanê, li dîasporayê hemû dem û dezgehên bi zimanî ve girêdayî û herweha pêkve xelkê me, dê layiqî berxwedan, xebat û têkoşîna zimanê Kurdî Cejna Zimanê Kurdî pîroz bikin. Dijî asîmîlasyona li bakur, li rojhilat û li dîasporayê pîrozkirina Cejna Zimanê Kurdî ji alîyê bîr û hizira li zimanê xwe xwudan derketinê ve jî dê gelek giring û bi mana be.

Bi vê bîr û bawerîyê KNK Cejna Zimanê Kurdî li temamî xelkê Kurd pîroz dike."