Amed
Îro li Amedê û li Stenbolê ji bo Newrozê delkerasyon hatin belavkirin. Hevserokê DEM Partî Tuncer Bakirhan got, "Kirmanşa çi be Hewlêr ew e, Silêmanî çi be, Qamişlo ew e. Kobanî çi be, Amed, Qers, Sêrt ew e; tu ferq di navbera wan de tune ye.
AMED
Koordînasyona Navendî ya Newrozê li Sumeperparkê ya Amedê bi civînek çapemeniyê deklarasyona Newrozê eşkere kir. Hevserokên Giştî yên Partiya Heremên Demokratîk (DBP) Çîgdem Kiliçgun Ûçar û Keskîn Bayindir, Hevserokê Giştî yê DEM Partiyê Tuncer Bakirhan, Hevberdevkê Înîsiyatîfa Yekîtiya Demokratîk Mehmet Kamaç, aktivîstên TJA'yê, endamên Meclisa Ciwanan a DEM Partiyê, nûner û rêveberên partiyên siyasî û rêxistinên sivîl û gelek welatî beşdarî civîna deklarasyonê bûn.
Li ser dikê pankarta “Newroza Azadî û Yekîtiya Demokratîk” hate daliqandin. Beriya ku deklerasyon bê eşkerekirin strana Komîna Hûnermendên Wanê bi navê “Newroza Serfiraziyê” hatibû amadekirin hate temaşekirin. Metna Deklarasyonê ya bi kurmancî ji aliyê aktivîsta TJA'yê Fatma Ablay ve hate xwendin. Piştre beşdar axivîn.
Va ne çend gotinên wan:
BILA BIBE NEWROZA AZADÎ Û YEKÎTIYA DEMOKRATÎK
Hevberdevkê Yekîtiya Demokratîk MEHMET KAMAÇ:
- Em careke din di demek dîrokî de pêşwaziya Newrozê dikin. Çima em dibêjin rojeke dîrokî? Heta niha bi rastî me digot, em di demên dîrokî re derbas dibin. Lê belê em vê dawiyê dibêjin, em di rojeke dîrokî re derbas dibin. Wekî Kawayê Hesinkar, bi hezaran sal beriya niha, li hemberî zilm û zordariyê serhildaneke/berxwedaneke bêhempa da û serkeftin û azadî pêk anî. Em dibêjin gelê Kurd bi sedan salan e li hemberî zilm û zordariyê bi rastî jî berdêlên gelekî giran dane. Bi rastî jî têkoşîneke bêhempa didin. Bi rastî jî rastî êrîşên qirkirin û tunekirinê hatine. Em dibêjin Newroza 2026’an, wekî ku hatiye pênasekirin, bila bibe Newroza azadî û yekîtiya demokratîk.
- Careke din êrîşên qirkirinê li ser kurdan hene. Me di peyamên xwe yên Newrozê de dît; gelo çi pîlan li ser kurdan hatin kirin, xwestin Rêveberiya Xweser a li Rojavayê Kurdistanê bi çi rengî têk bibin. Mebesta wan a serekî hemû destkeftiyên kurdan bûn, pêşeroja kurdan bû. Lê gelê kurd, miletê kurd li çar perçeyên Kurdistanê û dîasporayê, li kîjan dera dinyayê kurdek hebe, bi rihê yekîtiyê rabû pêyan. Em careke din li ser navê Însiyatîfa Yekîtiya Demokratîk we hemûyan bi hurmet û rêzdarî silav dikin û spasiya beşdarbûna we dikin.
TUNCER BAKIRHAN:
- Cîhan di nav şer de ye. Em dema dinêrin derdora xwe, gerek kurd bibin yek. Eger kurd yek bin, ne agirê Newrozê vedimire, ne jî kurd têk diçin.
- Îro li Rojhilata Navîn, hesabên nû hene. Her kes li ser kurdan daxive. Bila her kes bizanibe ku kurd xwedî dîrokek in, dîrokeke, xwedî îrade, xurt e. Înşallah, wê azadiya xwe, statuya xwe jî bistîne. Bila ev Newroz bibe Newroza azadiya gelê kurd u yekîtiya demokratîk. Bila ev Newroz bibe bersiva gelê Kurd.
- Qada Newrozê, yekîtiya gelê kurd ji Amedê heta Hewlêrê, ji Kirmanşahê heta Qamişloyê. Em ê bêjin yekîtî, yekîtî, yekîtî. Em dibêjin dem dema yekîtiya netewiya kurda ye. Newroz ji me ra dibêje yekîtî hêz e. Belê, îro ev peyam ji çar parçeyan derbas dibe. Agirê Newrozê îsal wê bibe meşaleya aştiyê.
'EMÊ BIGIHÎJIN STATUYA XWE'
- Kirmanşa çi be Hewlêr ew e, Silêmanî çi be, Qamişlo ew e. Kobanî çi be, Amed, Qers, Sêrt ew e; tu ferq di navbera wan de tune ye.
- Em gere bi baldar bin. Li Rojhilata Navîn qedera me diyard ikin. Ne li ser maseyê emê winda bikin, ne ji aliyê hêzên hegemonîk ve bigirin bavêjin aliyek.
Emê bigihîjin statuyê, ligel hemû gelan. Em hêvî dikin ev Newroz bibe wesîleya bidestxistina statuyê. Bila pîroz be.
SÎNAN ÇÎFTYUREK:
- Banga me ji bo gelê me û partiya me ev e; em yekîtiya xwe xurt bikin. Em yekîtiya Rojava û Başûr diparêzin. Dewletên dagirker dixwazin ku şik û gumanan bixin nav perçeyên Kurdistanê, nav Rojava û Başûr. Banga me ji bo gelê me ye, li her çar perçeyên Kurdistanê ye û bi taybetî ji bo gelê Amedê ye em Newroza 2026an bi girsayî pêk bînin.”
STENBOL:
Li Stenbolê jî li Otêla Elîte Worldê civîna çapemeniyê li dar ket Hevberdevkên HDK'ê Meral Daniş Beştaş û Alî Kenanoglû, Hevseroka Giştî ya DEM Partiyê Tulay Hatimogullari, mebûsa DEM Partî ya Şirnexê Newroz Uysal Aslan, akitîvistên TJA'yê, endamên Meclisa Ciwanan a DEM Partiyê, nûnerên partiyên siyasî, rêxistinên sivîl ên civakî û gelek welatî tev li civînê bûn. Parlamentera DEM Partiyê ya Şirnexê Newroz Uysal Aslan metna bi Kurmancî ya deklarasyonê xwend.
Di daxuyaniyê de hat diyar kirin ku kurdan li dijî zilam, kolonyalîzm û înkarê ber xwe daye û banga beşdariya Newrozê hat kirin.
***
Nûçeyên Eleqedar:
- Komên di Newroza Amed, Wan û Stenbolê de li ser dikê bin diyar bûn
- Va ye bajar bi bajar bername û diruşma Newroza îsal