Diyarname
Endama Encumena Parêzgeha Kerkûkê Perwîn Fatîh ji bo Rojnewsê axiviye û gotiye ku piştî Cejna Qurbanê wê yekemîn civîna Encûmena Parêzgariya Kerkûkê bê lidarxistin û pêşniyarî ji Sûdanî re dike ku eger aliyên siyasî negihin lihevkirinekê, bila Wezîrê Dadê yê Iraqê wekî Parêzgarê Kerkûkê destnîşan bike. Fatih wisa got, “Eger PDK bi kurdan re tifaqê neke û bi ereban re bike, ji bo PDK’ê û dîroka wê gelek xerab be.”
'2 HEFTE DEM DAYE PARTIYAN'
Perwîn Fatîh wisa gotiye: “Li gorî civîna herî dawî ya ligel aliyên siyasî yên Kerkûkê, Serokwezîrê Iraqê 2 hefte dem daye wan ku li ser pêkanîna hikumeta xwecihî lihev bikin. Lê ji ber hatina Cejna Qurbanê wê piştî cejnê û beriya dawiya meha hezîranê yekemîn civîna Encûmena Parêzgeha Kerkûkê were lidarxistin.”
Di dewamê de wê da zanîn ku danûstandinên avakirina hikumeta xwecihî ya Kerkûkê berdewam dikin, eger alî di civînê de bi Sûdanî re li hev bikin, dê Serokê Encûmena Parêzgeha Kerkûkê û Parêzgarê Kerkûkê bên hilbijartin lê eger li hev nekin, tenê wê encûmen bê aktîfkirin.
Perwîn Fatîh wiha pêde çû; “Ragirtina posta parêzgariya Kerkûkê ji aliyê ereban ve, di zerera kurdan de ye. Eger di 6 mehên borî de kurdan postê parêzgariyê werbigirta, dê pirsgirêkên ku li Kerkûkê rûberûyê kurdan bûn, çareser bibûna. Ji ber wê jî ne di berjewendiya niştecihên Kerkûkê û bi taybet Kurdan de ye ku dema destnîşankirina parêzgar paşve bixe. Ji ber ku ya niha sûd jê wergirtiye rêveberiya niha ya bajêre ku pirsgirêkên berdewam dê bêhtir sûdê bide wan.”
‘Kurd jî du salên destpêkê dixwazin û ereb jî’
Endama Encûmena Parêzgeha Kerkûkê da zanîn ku eger alî li hev nekin û encama hevdîtinan negihêje encamê, divê her aliyek ji bo yê din tawîzê bide û wiha domand; “Di destpêkê de me daxwaza 4 salan parêzgariya Kerkûkê kir. Lê eger li ser du salan lihevkirinek çêbibe dîsa têgihîştinek çêdibe. Ji ber ku ereb daxwaza du salên destpêkê yên postê Parêzgariya Kerkûkê dikin. Kurd jî daxwaza du salên destpêkê dikin. Ji ber vê yekê hê jî negihîştine tu encamekê.”
SERÎLÊDANA JI BO POSTÊ
Perwîn Fatîh li ser partiyên ku kêm kursî bi dest xistine û li posta parêzgariyê digerin got; “Her partiyek ku daxwaza postê Parêzgarê Kerkûkê bike divê li hejmara kursiyên xwe binêre. Eger partiyek xwedî du kursî ji bo postê parêzgar serlêdanê bike, partiyeke ku tu kursî bi dest nexist jî dikare ji bo postê parêzgar serlêdan bike.”
Endama Encûmena Parêzgeha Kerkûkê eşkere kir ku wê ji Sûdanî re pêşniyar kir ku eger aliyên siyasî heta piştî cejnê li ser destnîşankirina parêzgarê Kerkûkê negihin lihevkirinekê, divê di kabîneya xwe de Wezîrê Dadê yê Iraqê ji bo birêvebirin û çavdêriya parêzgehê destnîşan bike. Ne ji ber ku wezîrê dadê yê niha kurd e, eger ereb bûya, minê heman pêşniyar bikira. Ji ber ku Wezîrê Dadê pişta dewletê ye û dikare li gorî yasayê bi her awayî bi pirsgirêka Kerkûkê re mijûl bibe.”
REWŞA ZAGONÊ
Perwîn got; “Di civînên partiyên siyasî de sistbûnek heye, eger Sûdanî kesekê ji bo vê postê destnîşan bike, dibe ku alî neçar bimînin û hewl bidin hevdu fêm bikin û bigihin encamekê. Ji aliyê yasayî ve, Sûdanî nikare parêzgar tayîn bikin. Ji ber ku hilbijartin desthilatê dide partiyan ku parêzgeran destnîşan bikin. Lê li gor yasaya sererastkirî divê encamên hilbijartinan li Kerkûkê neyê berçavgirtin, ji ber ku bajarekê pir netewe ye, divê parêzgar bi danûstandin û lihevkirina di navbera aliyan de were destnîşankirin.”
QEBÛLKIRINA EREBAN AN KURDAN
Endama Encûmena Kerkûkê got; “Mihemed Şiya Sûdanî dosyaya Kerkûkê girtiye ser milê xwe û hewl dide navbeynkariyê di navbera aliyan de bike ji bo lihevkirina avakirina hikûmeta xwecihî ya Kerkûkê. Madem Sûdanî serpereştê pirsgirêkên Kerkûkê ye, divê rêyek ya çareseriyê jî bi wî re hebe. Lewra rastiyek heye ku eger ereb ji bo kurdan tawîzan bidin, dibe ku cemawerê ereban qebûl neke, an jî kurd ji bo ereban tawîzan bidin, dibe ku cemawerê kurdan qebûl neke. Lêbelê heke Sûdanî wekî kesek serpereşt an hakem ji bo postê parêzgarê Kerkûkê pêşniyar bike, dibe ku alî li hev bikin.”
Perwîn Fatîh da zanîn ku nabe ku encûmena Parêzgeha Kerkûkê were betalkirin, ev gotegotên li ser betalkirina partiyê ne îradeya gel e. Ji ber ku ne Dadgeha Federal û ne jî Serokê Tifaqê ku tu kursî bi dest nexistiye, nikare encûmena bajêr betal bike.
Têkildarî senaryoyên niha li ser hilbijartina Parêzgarê Kerkûkê wiha got; “Berî niha çend welatiyan ji bo feskirina Encûmena Parêzgariya Kerkûkê li Dadgeha Federalî gilî kiribûn. Dadgehê got ‘Ne di desthilata wan de ye ku meclisa parêzgehê hilweşînin’. Ji destpêkê ve ev yek bû bersiv. Ji ber ku Parlamentoya Iraqê piştî heft mehan hat avakirin. Lê niha eger aliyên Kerkûkê li hev nekin, divê Sûdanî bi xwe vê pirsgirêkê çareser bike.”
DIVÊ POST JI BO KURDAN BE
Li gorî Perwîn Fatîh hemû alî hewl dane li hev bikin û ji xwe re senaryoyekê çêbikin ku postê Parêzgarê Kerkûkê bidest bixin û wiha got; “Heta niha ereb jî di nava xwe de ne yek in. Hemû senaryoyên ku berê hatibûn pêşkeşkirin, hemû betal bûn. Niha tenê pêşniyarên du salan hene. Kurd li pêş in ku 2 salên destpêkê yên parêzgariyê bidest bixin. Ji ber ku kurdan heft kursî bi dest xistin. Kurd piranî ne û divê postê parêzgariya Kerkûkê ji bo Kurdan be.”
Di dawiyê de Endama Encûmena Parêzgariya Kerkûkê got; “Eger PDK bi Kurdan re tifaqê neke û bi ereban re bike, ji bo PDK’ê û dîroka wê gelek xerab be. Hemû hewldanên PDK’ê yên ji bo tifaqa bi partiyên din re têk çûn. Her kesê ku bixwaze li derveyî encamên hilbijartinê bi YNK'ê re danûstandinan bike, bê gûman dê têk biçe.”