Partiyên Yekitiya Nîştimanî ya Kurdî (PYNK) û Encûmena Nîştimanî ya Kurdî li Sûriyê (ENKS) bi amadebûna şandeyên ji her du aliyan, tevî fermandarê giştî yê QSD’ê Mezlûm Ebdî û nûnerê Amerîkayê yê Sûriyê William Robak daxuyaniyeke hevpar weşand û tê de destnîşan kir ku qonaxa yekemîn a diyalogên yekîtiyê bi dawî bûye û gihîştine nêrîneke siyasî ya hevpar.
Hate diyarkirin ku dê diyalog li ser bingeha Peymana Dihokê berdewam bike û di rojên pêş de peymaneke giştî were îmzekirin.
Di daxuyaniya ku hate weşandin de hat gotin ku 16’ê Hezîranê hatine ba hev û wisa dom kir: "Şandeyên Meclisa Nîştimanî ya Kurdî li Sûriyê û Partiyên Yekitiya Nîştimanî ya Kurdî pêvajoya destpêkê ji diyaloga kurdî bi dawî kir û bi hev re gihîştin nêrîneke siyasî ya hevbeş û lihevkirinên pêşîn ku bendên (rêvebirin, hevbeşî, ewlehî û parastin) ên Peymana Dihokê ya 2014’an bikin bingeha berdewamkirina dan û standin û diyalogên di navbera her du şandeyan de, wê peymaneke giştî di pêşeroja nêz de îmze bikin."
Her du şandeyan tekezî bi hevkarî û yekitiya kurdî li Sûriyê kiriye, ev gav wekî gaveke dîrokî ya girîng ber bi lihevkirineke mezintir û hevkariyeke pratîk di berjewendiyên gelê kurd li Sûriyê û hemû pêkhateyên Sûriyê de pêşwazî kirine û wiha dom kirine: "Her du şandeyan ev xebat oxirî cangoriyên mezin ên ciwan û keçên Sûriyê û bi taybet şehîd û birîndarên rojavayê Kurdistanê û malbatên wan kirin ku jiyana xwe kirin berdêla şerekî birûmet ji bo parastina cîhanê ji sitemkariya DAIŞ'ê.
Ev lihevkirin wekî gava yekemîn a girîng e ku em bi sponseriya cîgirê şandeyê amerîkî yê taybet ji Koalîsyona Navneteweyî re balyoz William Robak û fermandarê gîştî yê Hêzên Sûriya Demokratîk (QSD) general Mezlûm Ebdî de gihîştinê."
Her du şandeyan di daxuyaniyê de sipasiya Ebdî, Mesûd Barzanî, Nêçîrvan Barzanî û Dewleta Amerîkayê kirine.
Peymana Duhokê çi ye?
Di sala 2014'an de Tevm-Dem û ENKS li Duhokê hatibûn ba hev, li wir li ser peyamnek li hev kiribûn. Li gor wê peymanê dê mecliseke ji 30 kesî Rojavayê bi rê ev bibe ku ev sedî 40-40 ji her du aliyan (dike 24 kes), sedî 20 jî (6 kes) ji kesên serbixwe di nav de cih bigirin. Ji bo vê dê hilbijartin çêbibe. Her wiha yek ji xala peymanê jî ew bû li Rojava hêza YPG/YPJ wekî hêza hevpar a Rojava bê qebûlkirin.
Ji ser peymanê re 6 sal derbas bûne, niha ligel kantonên li bajarên Rojava, li bajarên din jî kurd di rêveberiyê de ne, QSD heye ku wan deran bi rê ve dibe. Rêveberiya Xweser heye ku bi salan e wan deran rê ve dibe. Niha dê rewş çawa be hê zelalî, yan jî bi gotineke din xal nehatine eşkerekirin. Wisa diyar e ku heta cihek li hev kirine û ev lihevkirin dê ber bi pêş ve bibin.
***
Nûçeya eleqedar:
- Cemal Şêx Baqî: ENKS’ê pirsgirêk derxistin