Diyarname

Enka Tirkiya de 7 zanîngehan de dersê ziwanî di binê namey beşanê Beşê Ziwan û Edebîyatê Kurdkî yê Enstîtuyanê Ziwananê Ganîyan estê. Enî zanîngehan enka komxebatêke viraşte. Di komxebateke de dewrê 40 kadroy Universîteya Artûklûyî ya Mêrdînî, Unîversîteya Çewlîgî, Unîversîteya Alparslanî ya Mûşî, Unîversîteya Wanî, û nîversîteya Sêrte beşdarî komxebate bî. Yînan serê ziwanî de henî biryarî girotî. Ma destê xo nêdanê daxuyanî yînan û bi heman tewrî neşr kenê:

“Ma sey beşanê ziwan û edebîyatê kurdkî yê enstîtuyanê ziwananê ganîyan ke nika hewt unîversiteyanê Tirkîya de estê, mabênê 31 gulanî û 1 pûşperî de, problemanê perwerdeya kurdkî ser o komxebatêke (çaliştay) amade kerde. Ma netîceyanê na komxebata xo ya hempare raya peroyî rê îlan kenê.

1) Ma qerar da ke komxebata ma her serre unîversîteyêke de bêro amadekerdiş.

2) Komxebate qerar da ke seba cardişê karanê komxebate, endamanê nê unîversîteyan ra komîsyonêk bêro viraştiş.

3) Komxebate qerar da ke seba yewkerdişê bername û mufredatê beşan xebate bibo.

4) Heme beşdaranê komxebate pêşnîyaz kerd ke serranê 2014 û 2015 de, muracaatê akerdişê doktora hetê YOK’î ra bêro qebulkerdiş ke wendekarê masterî bişêyê (bieşkê) perwerdeyê xo yê akademîkî bidomnê (dewam bikê).

5) Komxebate qerar da ke ganî 1500 wendekarê lîsansê berzî yê bêtezî yê ke bi lehçeyanê kurdkî kurmanckî yan zî zazakî wendo û mezûn bîyê, ca de dest bi kar bikîn.

6) Hêvîya komxebate a ya ke beşê lisansî yê ziwan û edebîyatê kurdkî bikewîn mîyanê lîsteya beşanê ke formasyon gênê.

7) Komxebate waşt ke heme unîversîteyanê mintiqaya ma de beşê ziwan û edebiyatê kurdkî bêrîn akerdiş.

8) Komxebate waşt ke fakulteyanê perwerdeyî de beşê mamostayîya kurdkî bêrê akerdiş û dosyayê ke YOK de derheqê na babete de yê berîn qebulkerdiş.

9) Komxebate eşkera kerd ke seba şaxê mayzanîstê (anabilim dali) ziwan û edebîyatê kurmanckî û ziwan û edebîyatê zazakî, ganî komîsyonê mîyanê unîversîteyan (universitelerarasi kurul) kadroyanê doçentî ako.

10) Komxebate qerar da ke beşê ziwan û edebîyatê kurdkî, hem têkilîyanê (ilişki) xo û unîversîteyanê Mintiqaya Federal ya Kurdîstanî hem zî têkilîyanê xo û heme sazgehanê sivîlan yê bi ziwan û edebîyatê kurdkî ra eleqedar aver bero.

11) Komxebate qerar da ke seba îlankerdişê babetanê tezan yê heme beşan, beşî yewbînî de têkîlî ronîn, nameyê tezanê ke qebul bîyê keyepelanê (ana sayfa) resmîyan yê beşan de îlan bikîn.

12) Komxebate qerar da ke heme beşê ma yê kurdkî, dersdayiş û nuştişê tezan de bi taybetî giranîye bidîn her di lehçeyanê kurdkî, kurmanckî û zazakî.