Diyarname

Parlemena Iraqê îro li hev civiya. Yek ji mijarên li ser biaxiviyana jî Helebçe bibe parêzgeh yan na bû. Lê ji ber ku parlemenên li ser navê YNK û PDK'ê beşdarî civînê nebûn, dengdana ji bo Helebçeyê hat bi paş xistin. Bi vî awayî jî ji bo niha Helebçe nebû parêzgeh.

Biryar ew e ku roja duşemê (18'ê mehê) dê ji bo vê yekê carek din dengdan çêbibe.

Serokwezîrê Hikumeta Herêma Kurdistana Federe Mesrûr Barzanî, cîgirê wî Qubad Talebanî, Awat Şêx Cenab û Ûmêd Sebah îro çûn Bexdayê û ligel Serokwezîrê Iraqê Mihemed Şiya Sûdanî re civiyan. Ji ber ev heyet li Bexdayê bû parlementerên kurd jî çûn pêşwaziya wan û beşdarî dengdana ji bo Helebçeyê nebûn.

Ev bi salan e gelê Helebçe li benda vê yekê ye ku Helebçe bibe parêzgeh, butçeyeke taybet ji bo wê bê veqetandin, karên nîvco mayî bên etemamkirin. Lê carek din ew negihîştin miraza xwe.

Li aliyê din ev bi salan e Bexda jî nedixwest Helebçe bibe parêzgeh. Îhtîmal heye ku di civîna pêşiya me de dengdan çêbibe û Helebçe wekî 19'emîn parêzgehên girêdayî Iraqê bê ragihandin.