Diyarname  

Bale ji Gellerê, Ronaldo ji Portekîzê ye û her du jî yek ji tîmên mezin a Ewropayê di Real Madrid de dilîzin. Îşev maça yekemîn a nîv fînala tûrnûvaya Euro 2016 hebû. Ji bo vê Galler û Portekîz hatin hemberî hev. Her du lîstikvanên di La Lîga de ligel hev dilîzin û di tîmên xwe yên neteweyî de lîstikvanên sereke ne, her du kaptanên tîmên xwe ne dê çi bikira? Ronaldoyê di maçên berî vî de zêde bi bandor nebû yan Baleyê kedek mezin da heta tîma wî hat vir dê bi ser biketa? 

Nîveka yekemîn a maçê bi 0-0 bi dawî bû lê serdestî di destê Galler de bû. Nîveka duyemîn bi serdestiya Portekîzê dest pê kir. Di deqîqeya 49'an de Ronaldoyê çav li ser bû derket ser dikê; gelek bilind bû, serek xweş li gogê da: 1-0. Gallerê hê şoka vê golê ser xwe neavêtibû di deqîqeya 53'yan de vê carê Nani xwe nîşan da: 2-0 

Di 15 deqîqeyên nîveka duyem de serdestiya Portekîzê hebû jê wêdetir Galler hakimê maçê bû lê fûtbolê ne li serdestî li golan û li skorê dinêre... ne şûtên  Bale ne atakên lîstikvanên din li ser navê Gallerê ne karîn skorê biguherînin û di encamê de Portekîzê derket fînalê; Ronaldoyê di maçên berê de bêdeng di vê maçê de hem deng derxist û hem ew, hem tîma wî Portekîz yekem car derket fînalê.  

Portekîzê heta niha di çarîk fînalê de Polonya (maç 1-1 bi dawî bûbû, bi penaltiyan 5-3),  di maçên 16 tîman de Hirvatistan bi 1-0 têk biribû û hatibû nîv fînalê. Gallerê di çarîk fînalê de Belçîka bi 3-1, di maçên 16 tîman de Îrlandaya Bakur bi 1-0 têk biribû û hatibû nîv fînalê. Di vê nîv fînalê de kîjan tîm derketa fînalê dê ne surprîz ba ji ber ku Portekîz bi tecrubeya xwe ya berê, Galler bi lîstika xwe ya bi maçên ku heta niha pê hatibû derketibû pêş. Ger pirsek wisa bê kirin "di vê maçê de serketin kîjan tîmî heq dikin" herhal dê bersiv Galler be lê her gav gog edaletê nîşan nade.

Sibê dê Almanya û Fransa maça din a nîv fînalê bilîzin. Kîjan bi ser bikeve di fînalê de dê bibe reqîbê Portekîzê. Maça fînalê jî êvara 10'ê mehê tê lîstin. 

KUNYE
STAD: Stade de Lyon
HAKÊM: Jonas Eriksson, Mathias Klasenius, Daniel (Swêd)
PORTEKÎZ: Patricio, Cedric, Bruno Alves, Fonte, Raphael, Joao Mario, Danilo, Adrien Silva, Renato Sanches (74.dq Andre Gomes), Nani (86.dq Quaresma), Cristiano Ronaldo 
GALLER: Hennessy, Chester, Williams, Collins(66.dq Jonny Williams), Gunter, Ledley (58.dq Sam Vokes), Andy King, Joe Allen ,Taylor, Gareth Bale, Robson-Kanu (63.dq Simon Church)
Qertên Zer:  Dq 8 Joe Allen, Dq 62 James Chester, Dq 88 Gareth Bale (Galler),Dq 71 Bruno Alves, Dq 72 Cristiano Ronaldo (Portekîz)
GOL: 50.dq Cristiano Ronaldo, 53.dq Nani (Portekîz)

Rekor di destê Ronaldo de ye
Û notek ji bo Ronaldo: Ronaldo xwedî rekora "Tekane lîstikvanê di 4 tûrnûvayên Ewropayê de gol avêtiye" û bi gola di maça Gallerê de avêt bû xwedî 9 golan (di van tûrnûvayan de) ku bi vê bû şirîkê rekora Michael Platini (Fransiz) ku rekora "Lîstikvanê di Tûrnûvayên Fûtbolê ya Ewropayê de Herî Zedê Gol Avêtiye" di destê Platini de bû. Li aliyê di bi vê maçê Ronalbû bû 132 cadar formaya tîma neteweyî ya Portekîzê li xwe dike ku di vî alî de jî xwedî rekor e. Wî di 20 maçên Tûrnûvaya Ewropayê de forma li xwe kiriye ku ev yek jî rekor e.

Notek ji bo Gallerê
Galler yekem car beşdarî Tûrnûvaya Ewropayê bû. Maçên ku lîstin, bi taybetî maça ligel Belçîkayê nîşan da ku heq kiriye heta niha hatiye. Tîma ku yekem car beşdarî tûrnûvayê dibe û heta nîv fînalê tê bi qasî tîma ku derbasî fînalê dibe çepikan heq dike.  

Û nota dawî
Di dawiya maçê de lîstikvanên her du tîman hev pîroz kirin. Bi taybetî Ronaldo û Bale ku hatin cem hev û hev pîroz kirin, li ser lingan demek bi hev re sohbet kirin.