Diyarname

Piştî erdheja Mereşê yek ji bajarên ku bi erdhejê hat rojevê jî Culemêrg bû. Niha Mebûsê HDP'ê yê Culemêrgê Saît Dede ev mesele bir Meclisa Tirkiyeyê. Dede pirsên xwe arasteyî 4 Wezîrên Tirkiyeyê kirin: “Gelo ji bo erdheja ku îhtîmal e li Colemêrgê çêbibe tu tevdîr hatine girtin?” 

Dede ji pirsiyarnameya xwe de xwest Wezîrê Karên Hundir Suleyman Soylu, Wezîrê Bajarvanî û Guherîna Avhewayê Murat Kurum, Wezîrê Veguhestin û Binesaziyê Adîl Karaîsmaîloglû û Wezîrê Tenduristiyê Fahrettîn Koca pirsên wî bibersivînin. 

Dede ji wan xwest di demek kurt de tevdîran bigirin, avahî bên kontrolkirin û hebin kêmasî bêne çareserkirin.

Mebûsê HDP'ê Dede ji wan wezîran ev pirs kirin:

- Di nava 5 salên dawî de li Colemêrg û navçeyên wê di mijara saxlemiyê de venêrîna çend xanî, avahî, kargeh û avadaniyan hatiye kirin? 

- Xetereya li ser dibistan û nexweşxaneyan di çi astî de ye? Testa xwelibergirtina erdhejê û nirxandina talûkeyê hatiye kirin an na? 

REWŞA AVAHIYAN ÇI YE?

- Di encama venêrînê de ji bo çend avahiyan biryara hilweşandinê hatiye dayîn? 

- Ji bo Culemêrg û navçeyê wê tu projeyên avahiyên komî yên dikarin xwe li ber erdhejê bigirin hene yan na? 

- Ji bo ku welatî ji avahiyên xetere li ser heye xelas bibin, li Culemêrgê tu xebatên we yên ‘veguherandina bajêr’ hene yan na? 

- Li hemberî erdhejeke ku îhtîmal e çêbe tu xebatên we hene? Di rewşek wisa de çend qadên we yên kombûnê yên lezgîn hene? Rewşa xurek, av, ceyran, germkirin, serşok, daşir û hwd. a van cihên kombûnê çawa ye? 

- Heta niha çend avahiyên li Culemêrg û navçeyên wê sûd ji efûya îmarê girtine? 

- Gelo hûn dê planên îmarê yên Culemêrg û navçeyên wê li gorî xetên fayê yên çalak nû bikin an na? 

- Di erdheja ku li Culemêrgê çêbibe de ji bo xizmetên saziyên dewletê asteng nebin tu planên we hene yan na?  

WE ÇEND KES PERWERDE KIRINE?

- Heta niha li Culemêrgê çend kes di mijara xebatên lêgerîn-rizgarkirinê de hatine perwerdekirin? Ji ber ku zimanê gelê bajar kurdî ye, dê perwerdeya kurdî bidin xebatkarên lêgerîn-rizgarkirinê yan na? 

- Qadên kombûnê yên erdhejê yên Culemêrg û navçeyên wê ku der in? 

- Di erdhejeke wisa de ji bo navenda Culemêrgê û navçeyê ji bo çareserkirina pirsgirêka kon û konteyniran tu tevdîr hatine girtin? 

- Li şaredariyên kayûm lê hatine tayînkirin, sepanên jeofîzîkê û etûtên zemîn li gorî qanûnan hatine kirin an na? Gelo we şaredarî kontrol kirine?

JI BO RÊYÊN CULEMÊRGÊ HÛN DÊ ÇI BIKIN?

- Rêyên di navbera Culemêrg û bajarên derdorê de gelek caran ji ber hezazê tên girtin. Di rewşeke îxtîmalî ya erdhejê de ji bo ev rewşa xetere dernekeve holê, gelo hûn dê tu xebatan bikin an na? 

- Tenê ji rêyeke mirov dikare bikeve Culemêrgê. Ji bo çêkirina rêyeke din a alternatîf, gelo tu planên we hene yan na? 

- Balafirgeha Geverê û xetên fayê li ber hev in. Gelo xetereya ku balafirgeh di erdhejê de xesar bibîne heye yan na? Ji bo pêşîlêgirtina vê tu xebatên we hene yan na? 

REWŞA NEXWEŞXANEYÊN CULEMÊRGÊ ÇI YE?

- Nexweşxane û saziyên tenduristiyê yên li Culemêrgê gelo ji bo erdhejeke îxtîmalî saxlem in an na? Gelo li van avahiyan testa xwelibergirtina erdhejê hatine kirin an na?”

Mebûsê HDP'ê yê Culemêrgê Sait Dede ji 4 Wezîrên Tirkiyeyê pirs kir ka ji bo erdheja ku dê li Culemêrgê çê bibe çi kirin û çi nekirin?