Cemil Oguz
Ji sal 1981'ê, li ser atmosfera wê demê, rewşa jiyan û siyaseta wê demê 'O...Çocuklari' ket vîzyonê.
Vê hefteyê O.. Çocuklari, Asla Pes Etme, Sê Rêbir, Beni Orada Arama, 'Hep Seni Aradim, Şantaj, 6 fîlm li vîzyonê ne
Li ser Derbeya 12'ê Rezberê filmekî din: 'O... Çocuklari'
Heta niha gelek fîlm li ser Derbeya 12'yê Rezberê hatin kişandin. Ji "Yol" bigire heta "Eve Donuş" û heta "Beynelminel"...
Sirri Sureyya Onder ku li ser derbeyê "Beynelminel"ekî mikemel pêşkêş kir vê carê bi senaryoya fîlmekî 12'yê Rezberê aniye ser perdeya spî. Fîlmê "O...Çocuklari" ku parçeyeke atmosfera giran a derbeyê bi zimanekî mîzahî nîşan dide, fîlmê dawî ye ku li ser Derbeya 12'yê Rezberê hatiye kişandin. Fîlm niha ket vîzyonê.
Senaryoya fîlmê "O...Çocuklari (Kure Q...)" ji aliyê Sirri Sureyya Onder ve hatiye nivîsandin û derhêneriya fîlm Murat Saraçoglu kiriye. Piştî derbeya 12'yê Rezberê ya 1980'yî jin û mêrek ku ji ber siyasetê polîs ketine dû wan dikin biryarê didin ku derkevin derveyî welêt. Lê mêr tê girtin, tê îşkencekirin, jin li derve bêyî bizanibe çi bike û bi ser de jî zarokek wan heye.
Di dawiyê de ji bo 'ciheke bi ewle' mala 'Dayika Mehtap' (Demet Akbag) hildibijêrin. Cihê ku wan zarokê xwe lê hiştiye mala Mehtaba ku berê karê xwefirotinê kiriye ye. Û ew Mehtaba niha li zarokên jinên ku bi mêran re radizin û vî karî dikin dinêre.
Diyak zarok di ciheke veşarî ya keştiyê de bi awayekî qaçax diçe Îtalyayê û li Îtalyayê buroya koçberan ji bo zaroka wê bînni wir keçikek bi navê Dona (Ozgu Namal) dişînin Tirkiyeyê. Bûyerên balkêş li vir dest pê dikin.
Di fîlm de bi têra xwe cinsiyet heye, jiyana zehmet, komedî, trajedî, daxwaza kuştina namûsê heye... Û kabûsa derbeyê jî bi ser de.
Dema mirov tenê bi çavê fîlmekî li meseleyê binêre fîlm hêjayî temaşekirinê ye. Lê dema ji aliyê 'ka ev çi kes in' lê binêre hin kêmasî dertên holê. Mînak ne diyar e keçik çima diçe Îtalyayê, yên ku li Îtalyayê ne çima di rewşeke wekî derbeyê de xwe dixin nav talûkeyê ji bo zarokek biçûk... Ji bilî hin kîteyên biçûk, fîlm bi diruşmên li ser dîwaran ên wekî "Karker gundî mil bi mil", fotografên li ser dîwaran ku hin jê ji doza kurdan hatine girtin, yan jî li wan digerin... Ev yek fîlm temam dikin. Ji bilî ev kîteyan ve fîlm xwedî kadroyeke serketî ye... Ji Îpek Tuzcuoglu, heta Demet Akbag, Altan Erkekli, her wiha zarokên biçûk rola xwe baş tînin cih.
Em bi van yekan "O...Çocuklari" dikin fîlmê hefteyê û pêşniyaza temaşekirinê dikin.
Kunye:
O.. Çocuklari / Kurê Q...
Derhêner: Murat Saraçoglu
Lîstikvan: Altan Erkekli, Ozgu Namal, Şevket Çoruh, Demet Akbag, Sarp Apak, Îpek Tuçcuoglu
Cure: Komedî / Dram
Sala Kişandinê: 2008
***
Û fîlmên din ên vê hefteyê:
Uç Haydut / Sê Haydut
(Tree Robbers)
Derhêner: Hector Babenco
Cure: Anîasyon
Sala Kişandinê: 2007
Hebû tune bû li nav daristaneke tarî de sê rêbir hebûn. Wan bi kumên xwe yên reş û dirêj û bi maskeyên rêbirî dikirin, şêlandina barên ser erebeyên hespan dikirin.
Yekî îsot diavêtin çavên hespan, yekî tekerên erebeyan dişkinandin, yê din jî bi tifingê xwe rêwî ditirsan. Rojekê dema êdî tiştek ku ji erebeyan bidizîn namîne, rêwiyê biçûk Tiffany didizin, lê Tiffany qet natirse, ji tirsê wêdetir dibêje qey li ser rêya êtîmxaneyê wî ji xwe re malbateke nû dîtiye; bi vê yekê jî kêfa wî hatiye. Û sê rêbirên me jî qet bawer nedikirin dê jiyana wan biguhere.
***
Asla Pes Etme / Qet dev jê bernede
(Never Back Down)
Derhêner: Leon Ichaso
Lîstikvan: Djimon Hounsou, Leslie Hope, Sean Faris...
Cure: Aksiyon
Sala Kişandinê: 2008
Jake nû li lîseyê dest bi xwendinê kiriye. Li vê derê ji nişke ve ew xwe di nav cureyeke klûba pevçûnê de dibîne. Tekane çareya Jake ew e ku reqîbê xwe têk bibe.
***
Beni Orada Arama / Ez ne li vir im
(I'm Not There)
Derhêner: Todd Haynes
Lîstikvan: Heath Ledger , Cate Blanchett , Christian Bale , Richard Gere...
Cure: Biyografî / Dram
Sala Kişandinê: 2007
Heft serdemên jiyana stranbêj û gotsazkerê muzîkê Dylan... Şeş lîstikvanên ku di nav van de jin jî hene van serdeman vedibêjin...
***
Şantaj
(Deception)
Derhêner: Marcel Langenegger
Lîstikvan: Ewan McGregor , Hugh Jackman , Michelle Williams
Cure: Aksiyon / Drama
Sala Kişandinê: 2008
Çarçoveya jiyana kesên di borsayê de her roj heşt saetan dixebitin pir teng e. Ji bo wan klûbeke şevê ya bi navê "Lîste" ku wekî cihê seksê ye heye. Ew bi telefonê bigerin û çend peyvan bibêjin, ev yek dibe dest pêka têrbûna ji têkiliya cinsîbûnê.
Ji sîmsarên borsayê Jonathan bi jineke razber re dikeve têkiliyê, wê dixe nava cîhaneke xinayet û kuştinan bêyî ku ew tişteke wisa xeyal bike..
***
Hep Seni Aradim / Ez her li te geriyam
(Wicker Park)
Derhêner: Paul McGuigan
Lîstikvan: Josh Hartnett, Rose Byrne, Diane Kruger, Matthew Lillard
Cure: Dram / Romantîk
Sala Kişandinê: 2004
Matthew li herêma Wicker Park a Şikagoyê rojekê dibîne ku keçikek li vîtrîna dikana pêlavan a hevala wî Luke dinêre.
Bi vê dîtinê de êdî dê Matthew ji bo bi wê re bikeve têkiliyê serî li her rêyê bide lê dê nizanibe ku ev yek dê bandorê li hemû jiyana wî bike.Matthew û Lisa evîndarê hev dibin û qeder bi toran xwe li wan dipêçe.