SERBAZ SIYAMEND
Li payîzê reng çawa dibin? Govenda rengên payîzê çawa dibe? Û dema ev di pêşangehekê de bên ber çav?
Li Hewlêra Herêma Kurdistana Federal, pêşengeha wêneyan a bi navê Govenda Rengên Payîzê hat vekirin.
Pêşengeha wêneyan a wênesaz Şêrzad Hiranî, bi navê Govenda Rengên Payîzê, li Salona Galeriya Kurdistan a li Hola Medya ya li Hewlêrê hat vekirin.
4'emîn pêşengeha ku 52 wêne tê de hene, ji aliyê Wezareta Rewşenbîrî ve hatiye organîzekirin. Pêşengeh, bi beşdariya mamostayê zanîngehan û nûnerên wezaretên Herêma Kurdistana Federal hate vekirin.
Wênesaz Şêrzad Hîranî ku der barê pêşengehê de agahî da DÎHA'yê, wiha got: "Em her tim di demsalên wekî zivistan, havîn û biharê de çend rengan dibînin. Lê min xwest bi wêneyên xwe yên ku ev 3 sal in li ser dixebitim, bikarim gelek rengên cuda yên payîzê nîşanî binerên xwe bidim."
Hiranî, hestên xwe yên der barê pêşengehê de jî, bi van gotinan anî ziman: "Dixwazim di Govenda Rengên Payîzê de, aramî û hesyanek bidim gele xwe. Gelê xwe yê ku her tim di rewşeke aloz de ye, bi pirsgirêkên siyasî û zehmetiyên jiyanê re rû bi rû ye."
Pêşengeh, wê 3 roj vekirî bimîne.
Ji DÎHA'yê hatiye girtin