Diyarname
Helbestvanê kurd ê gorbihuşt Arjen Arî roja 30'yê mehê kewçêra 2012'yan de wefat kir. Di vê salvegera wefata wî de em pirtûka wî ya nû pêşniyarê we dikin.
"Heftê û du Nefi”, berhema Arjen Arî ya ku piştî wefata wî gihîşt ber destên helbesthezan. Wekî yên berê di van helbestan de jî Arî, ji ‘evînê’ heta bi ‘kula niştimanî’, hemû kirû û kêliyên jiyanê, bi tehm û çêja kurdiya şîrîn aniye ziman. Ev berhem bi hewldana xwişka wî Stî Necla û Weşanxaneya Evrensel Basim Yayimê derket pêşberî xwendevanan.
Pirtûka ku ji helbestên Arjen Arî yên di demên cuda cuda de nivîsîne pêk tê di vê gulana 2016'an de ji Evrensel Basimê derket.
Arjen Arî ku di sala 1956'an de, li herêma Omeriya, li gundê Çalê hatiye dinyayê. Di sala 1979'an de Enstîtuya Perwerdeyî ya Diyarbekrê Beşa Zimanê Tirkî qedandiye.
Arî, di sala 1976'an de li Nisêbînê ji ber belavkirina belavokekê tê girtin û polîs dest datînîn ser şîrên wî yên bi tirkî û kurdî. Piştî bi hefteyekê wî ber didin lê helbestên wî hê jî di mexzena Dadgeha Nisêbînê de girtî ne.
Digel, ku wekî cara pêşîn di kovara Tîrêjê de helbestên wî weşiyan tê zanîn jî rastî ev e: Helbesta wî ya pêşîn di belavokeke ku li herêma Mêrdînê hate belavkirin de weşiya. Ew helbest ji sê malikan/beytan pêk dihat û malikek jê ev bû: Du mirin kirin mahne, rakirin ling Nisêbînê/Xewa sibê bela kirin, avêtin nav tirs û xwînê.
Nivîskar û helbestvan Arjen Arî di sala 1992'yê li navçeya Nisêbînê li ber deriyê mala xwe rastî êrîşeke çekdarî tê û bi birîndarî radikin Nexweşxaneya Zanîngeha Dîcleyê. Arî ji wê rojê de li Amedê dijiya heta wefat kir. Wî demek dirêji di Diyarname û Azadiya Welat de jî qunciknivîskarî kir.
Berhemên wî ev in:
- Ramûsan min veşartin li geliyekî / Helbest, Avesta, 2000
- Ev çiya rûspî ne / Helbest,, Avesta, 2002
- Destana Kawa / Helbest, Weşanên Elma, 2003
- Eroûtîka / Helbest, Weşanên Lîs, Şi‘r, 2006
- Bakûrê Helbestê / Antolojiya Helbesta Bakûr, Weşanên Yekîtiya Nivîskarên Kurd-Duhok, 2008
- Şêrgele / Helbest, Avesta, 2008
- Çil Çarîn / Helbest, Weşanên Enstîtuya Kurdî ya Amedê, 2008
- Heftê û du Nefî / Helbest, Weşanên Evrensel, 2012
- Kulîlkên Beîvan / Helbest, Weşanên Ronahî / 2012
- Gorî û Bindest / Helbest, Weşanên Ronahî, 2012
- Xasenezer / Ceribandin, Weşanên Evrensel Basim Yayin /2012
- Şiîr û Sînor / Helbest, Weşanên Evrensel Basim Yayin, 2013
- Xame sihurî kaxiz şiyar ma / Ceribandin, Weşanên Ronahî, 2013
- Heftê û du Nefî / Helbest / Weşanên Evrensel / 2016
Vaye çarîke ji pirtûkê:
Hîv ber bi sibê de dirê
şev ber bi rojê de.
ez ber bi te de têm,
li dû hivê, di şevê de...
- Heftê û du Nefî / Arjen Arî / Helbest / Weşanên Evrensel / 88 rûpel / 2016