RIHA

Heyetek ji BDP'ê ku di nav de Hevserokê KCD'ê Ahmet Turk jî hebû, çû sersaxiya malbata Îdrîs Akgul ê di encama topa hewana çeteyan de li Serêkaniyê jiyana xwe ji dest da. Turk nerazîbûn nîşanî astengkirina çûyîna Hevserokê PYD'ê Salih Muslim a ji bo başûrê Kurdistanê da û got, "Kek Mesûd bivir li lingê xwe dixe."

Ji bo malbata Îdrîs Akgul ê ji ber topa hewana çeteyên El Qaîdeyê li taxa Cumhuriyetê ya Serêkaniya Rihayê jiyana xwe ji dest da, li gundê Axirtoşê konê sersaxiyê hat vedan û serdan dewam dikin. Ligel Hevserokê Kongreya Civaka Demokratîk (KCD) Ahmet Turk, endamê Meclisa Partiyê ya BDP'ê Mehdî Aslan, Hevseroka BDP'ya Rihayê Leyla Akça, Şaredarên Wêranşar û Serêkaniyê gelek kes çûn sersaxiyê. Turk û heyeta pê re ji aliyê malbata Akgul û gundiyan ve hatin pêşwazîkirin. Turk û yên pê re derbasî binê kon bûn û ji bo malbatê bêhnfirehî û aramî xwestin. Şaredarê Serêkaniyê Îsmaîl Arslan di axaftina xwe ya li serdanê de xwest, Tirkiye tavilê li dijî êrîşên çeteyan tedbîran bigire.

Hevserokê KCD'ê Ahmet Turk jî da xuyakirin ku piştî zilma hezar salan kurd îro di encama berdêlên giran de xwe gihandiye asteke nû û destnîşan kir ku ew ne dijminê tu gelî ne. Turk got ku ew alîgirê biratiya gelan in û diyar kir ku hêzên serdest dixwazin gelê kurd ji holê rakin û got, "Dixwazin li Rojhilata Navîn gelan bînin pêşberî hev, li Rojava Kurd têkoşîna azadî û hebûnê dimeşînin. Çete bi qasî dijminê Kurdan e, ewçend dijminê Ereban e."

Ahmet Turk di dewama axaftina xwe de nerazîbûn li astengkirina çûyîna Hevserokê PYD'ê Salih Muslim ji bo Başûrê Kurdistanê nîşan da û got, "Kurd sînorê xwe li Kurdan digire. Kek Barzanî bivir li lingê xwe dixe. Ev helwesta wî dikare di nava Kurdan de rê li ber encamên neyînî veke. Eger em nebin yek, emê bandora xwe ya li cîhanê winda bikin. Yekbûyîn û yekitiya me, dê bi dijminên Kurdan re gavan bide avêtin." 

Ahmet Turk bibîr xist ku tevî Akgul li Serêkaniya ser xetê heta niha 5 kes di encama êrîşên çeteyan de jiyana xwe ji dest dane û got, "Divê Tirkiye li hemberî van çeteyên ku wê di pêşerojê de bibin belayê serê wê, tedbîran bigire." Ahmet Turk axaftina xwe bi gotina pêşiyan; "Ga dimire çerm dimîne, Mêr dimire nav dimîne" bi dawî kir.