FEHMÎ KATAR / BERLÎN
Koma Teatra Jiyana Nû, lîstika xwe ya bi navê "Bêrû" li Berlînê nîşan da. Ev lîstika nivîskarê metnên şanoyê yê îtalî yê navdar Dario Fo bû ku komê wergerandiye kurdî û li ser sehnê bi performansa xwe nîşan dide.
Dario Fo yê ku bi rexneyên xwe yên li Kapîtalîzmê û metnên xwe yên şanoyê yên li ser têkoşîna çînan tê nasîn, xelatgirê Nobeta Wêjeyê ye jî. Teatra Jiyana Nû lîstika “Lo sghignazzo della paura” ya ku Dilawer Zeraq wekî Bêrû wergerandiye kurdî, adapte kiriye. Lîstik bi jornivîs li Berlînê hat nîşandan. Derhêneriya lîstikê jî Nazmî Karaman dike. Lîstik li gelek deveran hat nîşandan û ecibandin. Teatra Jiyana Nû ya ku ji 1991ʼê ve şanoya bi kurdî dike, bi vê lîstikê li Moskovê di festîvaleke şanoyê de wekî koma herî serketî hat xelatkirin.
Şano li hola Tiyatrom hat nîşandan. Lîstikvan Omer Şahîn, Rûgeş Kirici, Sakîne Jîr, Cîhad Ekinci û Nazmî Karaman bûn. Mijar jî Îtalyaya salên 1980ʼyî ye; çerxa di navbera sermaye, dewlet û milet de li ser dikê ye. Patronê FIATʼê tê revandin, di rê de qezayek dibe, patron bi giranî birîndar dibe û rûyê wî êdî nayê naskirin. Teknîsyenek wî xilas dike lê nasnameya xwe li cemê ji bîr dike. Doktor dibêjin qey patron teknîsyen e û bi emeliyetên estetîk wî dişibînin teknîsyenî. Jina teknîsyenê bi navê Antonio, Rosayê bi xwe hay ji tiştekî nîn e û di navbera du Antonioyan de diçe û tê.
Lîstik hat ecibandin
Metn bi hostetî hatiye wergerandin û carinan îşaret bi bûyerên siyasî yên aktuel jî dike. Temaşekeran li Berlînê hem lîstik û hem performansa Teatra Jiyana Nû eciband.
Doh jî li heman holê lîstika ji filmê Charlie Chaplin a bi navê “Dîktatorê Mezin” bi navê “Tenê Ez” hatiye adaptekirin, hat nîşandan. Teatra Jiyana Nû piştre wê di çarçoveya turneya xwe ya Ewropayê de biçe Hamburgê.
Yenî Ozgur Polîtîka