Diyarname
Kûpaya Cîhanê 2018'an ku li Rusyayê li dar ket îro bi lîstina maça fînalê bi dawî bû. Fransayê Hirvatistan bi 4-2 têk bir û bû şampiyonê dinyayê.

Fransa piştî 20 salan dixwest carek din kûpayê bi dest bixe. Hirvatistan yekem car di dîroka xwe de derketibû fînalê û dixwest kûpayê bigire. Her du tîm bi vî awayî dest bi maçê kirin. Di deqîqeya 18'an de gog hat li serê lîstikvanê Hirvatistanê Mondzukic ket û li ser navê Fransaye bû got: 1-0. Hirvat hejiyan lê li erdê neketin: Di deqîqeya 28'an de Perisic gol avêt û encam kir 1-1.
Maç dewam dikir, Hirvatistanê ber xwe dida, atak jî dikirin lê bêoxiriya li ser wê bi dawî nedibû: Di deqîqeya 38'an de gog li destê lîstikvanê Hirvatistanê Perisic ket, lîstikvanên fransiz daxwaza penaltiyên kir, hakêm didul ma û di dawiyê de çû li VAR'ê (Hakêmê Alîkar Vîdyo) mêze kir û ji bo penaltiyê fîrfîrok lêda. Û Griezmann penaltî veguhart golê: 2-1.
Nîveka yekemîn bi 2-1'ê bi dawî bû. Di nîveka duyemîn de Fransa hê serdest bû. Di deqîqeya 59'an de Pogba rê li ber serketina Fransayê vekir: 3-1 û gotina dawî Mbappe di deqîqeya 59'an de got: 4-1. Di deqîqeya 69'an de ji xetaya qeleparêzê Fransa Lloris lîstikvanê hirvat Mandzukic gol avêt lê vê yekê bi têra Hirvatan nekir. Di dawiya dawî de Fransa bi 4-2'yan kûpaya îsal bir mala xwe. Fransa di dîroka Kûpaya Cîhanê de piştî sala 1998'an ev dibe cara diduyan kûpayê dibe mala xwe.

Çend gotinên din
Kûpa bi dawî bû, Fransa bi ser ket lê li aliyê din lîstikvanên serketî yên hemû tûrnûvayê jî diyar bûn.
Lîstikvanê îngilîz Kane bi 6 golan bû golavêjê tûrnûvayê.
Qeleparêzê belçîkî Cortua wekî qeleparêzê herî serketî hat hilbijartin û lepikên zêrîn girt.
Kaptanê Hirvatistanê Modric ku 3 caran wekî lîstikvanê herî serketî yê maçê hatibû hilbijartin bi îro re wekî Lîstikvanê Herî Serketî yê Tûrnûvayê hat hilbijartin û Goga Zêrîn girt.
Lîstikvanê Frasayê Mbappe jî wekî lîstikvanê herî ciwan ê gol avêtiye ket nav dîrokê.

Pussy Riot ket nav sehayê
Di navberê de dema maç dihat lîstin çend kes ketin nav sehayê. Piştî maçê koma bi navê Pussy Riot ev çalakî girt ser milên xwe û ragihand ku ji bo serbestberdana girtiyên polîtîk û dawîlêanîna binçavkirinên derzagonî wan ev çalakî kiriye.
Gelek endamên Pussy Riot ji ber ku berê rexneyan dabûn Serokdewletê Rusyayê Vladimir Putin hatibûn girtin û girtî mabûn.