Diyarname
"Di sala 1980'yî de gava ez hatim Swêdê min teqwîmên bêrîkê dikirîn, tê de programa xwe, karê ez ê bikim, notên xwe yên rojane dinivîsin. Ji ber ku teqwîmên bêrîkê biçûk bûn, min nikarîbû şiroveyên xwe, tiştê zede tê de binivîsiya. Lema min her sal defterek, du defter dikirî û kar û barên min dikir, fikrê xwe, hestên xwe di wan de dinivîsi. Nivîsîna rojnivîskên min bi vî hawî dest pê kir."
Nivîskar Zinarê Xamo bi vî awayî dest bi pirtûka xwe kiriye. Pirtûka wî ya nû bi navê "Rojnivîskên Sirgûnekî" (1985-1999) ji Weşanên Pallê derket. Çîroka pirtûka li ber dest di salên 1980'yî de dest pê dike. Xamo ku yekî sirgûnî ye wan salan ji Tirkiyeyê her pirtûkan dixwaze, dixwîne. Li wir rastî gelek nivîskarên ku bîranînên xwe nivîsandine tê û ev yek ji bo wî jî dibe rêyek. Xamo qala hin navan dike û paşê dibêje, "Bi tesîra van nivîskarên tirk, min jî di sala 1981-1982'yan de dest bi nivîsîna notên rojane kir."
Nivîskar Zinarê Xamo carinan navber dabe jî ji wê demê ve rojnivîskên xwe dinivîse û jixwe piştî pêşketina teklonolojiyê vê carê wan rojnivîskan di bloga xwe de dinivîse. Pirtûka li ber dest ji notên wî yên navbera salên 1985-1999'an pêk tên.
Nota yekem ku ketiye pirtûk wisa dest pê dike, "Çûm şîna partiya Samî Abdurehman".
Not, rojnivîskarên kesan her dem bûne dîrok, ji bo nivîsandina pirtûkên dîrokî bûne bingeh. Notên di vê pirtûkê de jî parçeyeke ji serdemekê nîşan didin loma jî girîng in.
Di pirtûkê de li ser siyaseta wan, li ser xebatên ziman, li ser jiyana rojane gelek notên cuda cuda hene. Va ne hin ji wan:
15.09.1985: Îro li Swêdê roja hilbijartinê bû. Cara pêşî bû min ê raya xwe bida. Piştî danê nîvro min Çû raya xwe da partiya APK. APK partiyeke kommunîst a karkeran e (…). Mafê min ji bo dengdana belediye û encumenê tenê heye, ji bo parlementoyê tüne ye. Ji ber ku hîn ne hemwelatiyê Swêd im, mafê min ê dengdana parlementoyê tüne ye. Mehmut go, min raya xwe da VPK'ê. Min jî got te yê wer nekira, we yê wek komite biryarek bigirta, me yê gişa li gor wê rêyen xwe bida. Got baş e ezê niha bi Heyder (Diljen) re bipeyivim…
07.12.1985: M. Emîn Bozarslan îro li ser kovara Jînê cilda duduya civînek çêkir. Dûr û dirêj, hêdî hêdî qala xebata xwe kir. Karekî zor û hêja ye. Gelek kes hatibûn civînê.
16.01.1986: Mehmed Uzun li Lararhogskolanê li ser romana xwe 'Tu' civînek çêkir. Ji saetekî zêdetir peyivî. Bi vê axaftina wî ya dirêj bêhna her kesî teng bû.
19.05.1987: Kes nizane em bi çi halî vê rojnameyê derdixin. Ne ev îdîalîzm buya me nikanîbû ev rojname derxista.
28.11.1992. Me xwar, vexwar û dilê xwe li siyasetê rehet kir. Jixwe her cara em tên ba hev mijara me siyaset e. Em diqeyivin lê tiştekî safî nakin.
10.03.1996: Ez li vî welatî gelek caran xwe wekî girtiyekî muebetê hîs dikim. Çimkî ez nizanim cezayê min ewê kînga biqede.
15.06.1996: Malmîsanij li ser zazakî konferansek da. Konferansa wî pir baş bû, înformatîk bu.
23.04.1999: Pir mixabin MED TV'ê jî girtin. Ez pir û pir li ber ketim fena ku ewladekî xwe winda bikim.
31.05.1999: Di jiyana xwe de tu carî hewqasî xemgîn û xeyalşikestî nebûme. Ji bo min îro rojeke herî bi jan û êş e.

- Rojnivîskên Sirgûnekî (1985-1999) / Zinarê Xamo / Weşanên Pall / 158 rûpel / 2024 / Rojnivîsk