BONN
Serokê Konseya Rêveber a KCK’ê Murat Karayilan daxuyaniya Rêberê PKK'ê Abdullah Ocalan a di Newroza Amedê de hate xwendin nirxand û got: “Peyama Rêber Apo, peyama tevgera me ye.” Karayilan da zanîn ku ew ji îro û pê de agirbest îlan dikin û ji bo mijara vekişînê jî got: “Ger ku dewleta Tirkiyeyê, hikumet û parlemento li erkên xwe rabe, ji bo paşvekişandinê, biryara pêwîst bigire, komîsyonên pêwîst, saziyên pêwîst ava bike, bingeha paşvekişandinê ava bike em ê wê jî pêk bînin.”

Karayilan peyameke bi deng ji bo pîrozbahiya Newroza ku li bajarê Bonna Almanyayê li dar ket şand. Karayilan peyamên Ocalan wekî peyamên dîrokî bi nav kir û wisa got: "Li Amedê li Newroza Amedê, roja Newrozê, rûpelek nû ve bû û dîrokek nû hat nivîsandin. Peyama ku hate pêşkêşkirin pir dewlemend, kûr, bi wate û hêja ye. Ne tenê ji bo bakurê Kurdistanê, ji bo tevahiya Kurdistanê hêja ye, ji bo tevahiya Tirkiyeyê û ji bo tevahiya herêmê jî rûmeteke xwe ya girîng heye. Ji ber ku bi xwe re demeke nû pêş dixe. Rûpelek nû vedike. Niha her kesek dipirse, ka helwesta PKK-KCK’ê dê li hemberî vê banga Rêber Apo çi be. Ez niha li ser navê tevahiya tevgera me, bi şahidiya we hemûyan helwesta tevgera me aşkere dikim: Peyama ku Rêber Apo daye, di heman demê de peyama me ye jî. Em qebûl dikin û tevlî dibin. Naveroka wê, çarçoveya wê, em dîrokî dibînin rast dibînin û pir girîng dibînin. Wekî destpêka qonaxeke nû û pêvajoyeke dîrokî dibînin. Ji bo wê yekê, ji dîrokê peyam hate pêşkêşkirin, ji 21’ê Adarê û vir ve, em wekî tevger, wekî KCK, PKK, HPG bi şêwazeke fermî û eşkere agirbest îlan dikin."