Diyarname

Hevgirtina Rewşenbîrên Rojavayê Kurdistanê (HRRK) ji sala 2016'an ve "Xelata Afirandinê" ku wekî xelata salê dide kesên ked dane kurdî. Komîteya HRRK'ê ji bo sala 2023'yan du nav hilbijart: Muzîkar Mehmûd Berazî û Sefqan Orkêş.

JI SALA 2018'AN VE XELATÊ DIDE

HRRK'ê di sala 2016'an di kongreya xwe ya pêncan ku li Qamişloyê li dar ket de biryar girt ku xelateke bi navê "Xelata HRRK'ê ya Afirandinê" bide ku her salekê vê xelatê pêşkêşî dahêner û afirênerekî kurd bike.

HRRK ligel plaketek hezar dolarê amerîkî jî wekî xelat dide û ji bo dayîna vî pereyî jî her sal sponsoran peyda dike.

SPONSORÊ XELATÊ

Nirxê xelatê 1000 dolarê emerîkî ye, ev xelat serê şeş salane bi sponserî û alîkariya welatparêz û karsazên kurd berdewam dike. Îsal bi sponsoriya Dr. Mihemed Elî Ebdê (Dr. Memo) ev xelat tê dayîn.

'DU ŞERVANÊN PEYV Û STRANÊ'

Komîteya xelatê ya HRRK'ê îsal nîqaşê dûr dirêj kirin, dor 30 navî diyar kirin û ji nav wan du hunermendên ku karê muzîkê dikin û di karê xwe de serketî ne diyar kirin. HRRK'ê ji bo vê yekê di duxayaniya belav kir de wisa got, "Du xebatkarên qada afirandin û dahênana bê rawestan û bê westan ku temenên xwe ji bo berfirehkirina asoyên hunera resen û vedîtina kêlîkên wendayî yên bîrdank û hiş û bîr û şopên talanbûyî yên hest û nestan terxan kirine. Du şervanên peyv û stiranê, û du serkêşên gernameya hunera kurmanciya me ya birîndar, ku bi dehan sal in li koşeyên tarî, li gencîneyên veşartî digerin û hewl didin pêşkêşî me û nifşên nû bikin. Komîteya Kargêr bi navê hemû endamên HRRK'ê her du xelatgirên 'XELATA HRRKê YA AFIRANDINÊ' ya sala 2023ê; muzîkjenê afirêner Mehmûd Berazî û hunermendê behremend Sefqan Orkêş ji dil û can pîroz dike, serkeftin û berdewamiya berhemdayîn û afirandinê ji wan re dixwaze."

XELATÊN HETA NIHA

HRRK'ê di sala 2018'an de xelat da şêwekar Zuhêr Hesîb, di sala 2019'an xelat dabû nivîskar Reşîd Sofî û muzîkar Mihemed Elî Şakir, di sala 2020'î de xelat dabû zimanzan Deham Ebdulfetah û nivîskar Merwan Berekat, di sala 2021'ê de xelat dabû Konê Reş û Salihê Heydo û di sala 2022'yan de jî şemat dabû Mizgîn Tahir û Berzo Mehmûd.

 ***

Nûçeyên Eleqedar:

- HRRK 'Xelata Afirandinê' dide Heydo û Reş

- HRRK'ê xelat da Deham Evdulfetah û Merwan Berekat

- HRRK'ê xelat da şêwekar Zuhêr Hesîb

***   

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.