Diyarname
Xweşikiya bajarên kurdan her demê xwe nîşan dide. Her çiqas dewlet xwedî li vê xweşikiyê dernekeve, hin deran têk bibe jî (mînaka Heskîfê li holê ye) ev xweşikî di xebatên cur bi cur de xwe nîşan dide. Herî dawî ji van bajarên kurdan ên xweşik du cih, Mêrdîn û Heskîf bûn navenda kişandina reklama şîrketan. Van ji wan reklaman du heb:

'Fabrîka' li Mêrdînê bû

Fabrîka yek ji markeyên mezin e ku kincên jin û mêran difroşe. Fabrîkeyê ji bo koleksîyona xwe ya vê zivistanê li Mêrdînê wêne kişandin û pêşkêş kirin.
Li Keleha Mêrdînê, Medreseya Zincîriye, avahiya dîrokî ya PTT'ê, Mizgefta Şehîdiye, Çarşiya Sifirkaran, qehwexaneyên Mêrdînê, xaniyên kevnare yên 700 salî ji bo kişandina wêneyên markeya Fabrîkeyê bûn fon. Bi vê reklamê hem aliyên xweşik ên Mêrdînê careke din derketin pêş çavan hem jî markeyê xweşikiya xwe nîşan da.
Fabrîka ku heta niha li gelek bajarên kevnare reklamên xwe kişandibû Mêrdîn jî li van zêde kir.

'Kigilî' li Heskîfê bû

Yek ji markeyên mezin ên Tirkiyeyê jî 'Kigilî' ye. Kigilî vê carê reklamên kincên xwe li Heskîfa ku di bin tehdîda bendavê de ye kişand.
Li kuçeyên Heskîfê, hemberî pirê Heskîfê Kigilî wêneyên cur bi cur kişandin û wekî reklam pêşkêşî raya giştî kirin. Heskîfê bi van reklaman careke din xweşikiya xwe nîşan da.

Û wekî notek: Bi weşandina vê nûçeyê re me jî reklama wan kir, lê bila be. Her kesek/şîrketek xweşikiya bajarên kurdan derxe pêş, emê jî wan derxin pêş.